నోయిడాలో 43వ అంతస్తు నుంచి దూకి సాఫ్ట్‌వేర్ ఇంజినీర్ మృతి
నోయిడా: నోయిడాలో సాఫ్ట్‌వేర్ ఇంజినీర్ సంభవ్ జైన్ 43వ అంతస్తు నుంచి దూకి మృతి చెందిన ఘటన విషాదాన్ని నింపింది. కుటుంబ, వ్యక్తిగత సమస్యల నేపథ్యంలో ఆయన ఈ నిర్ణయం తీసుకున్నట్లు ప్రాథమిక సమాచారం. ఘటనపై పోలీసులు దర్యాప్తు చేస్తున్నారు.
సంభవ్ జైన్‌కు 2023లో వివాహం కాగా, ఒక కుమారుడు ఉన్నట్లు సమాచారం. 2025లో భార్యతో విడాకులు తీసుకున్నట్లు తెలుస్తోంది. విడాకుల అనంతరం భరణం కింద భార్యకు రూ.3 కోట్లు చెల్లించాలని కోర్టు ఆదేశించినట్లు కుటుంబ వర్గాలు తెలిపాయి. ఇందులో ఇప్పటికే రూ.1 కోటి చెల్లించినట్లు పేర్కొన్నారు.
మిగిలిన రూ.2 కోట్ల భరణం చెల్లించాల్సి ఉండటంతో సంభవ్ జైన్ ఆర్థిక ఒత్తిడికి గురైనట్లు కుటుంబ వర్గాలు చెబుతున్నాయి. ఈ నేపథ్యంలో తాను మరణిస్తే కుటుంబంపై ఆర్థిక భారం ఉండదనే ఆలోచనతో ఆయన ఈ తీవ్ర నిర్ణయం తీసుకున్నట్లు సమాచారం. అయితే ఆత్మహత్యకు ఖచ్చితమైన కారణాలను పోలీసులు దర్యాప్తు అనంతరం వెల్లడించాల్సి ఉంది.
ఆత్మహత్యకు ముందు సంభవ్ జైన్ తన తండ్రికి ఓ సందేశం పంపినట్లు సమాచారం. అందులో “నాన్నా.. ఇక మీరు ఎవరికీ డబ్బులు ఇవ్వాల్సిన అవసరం లేదు” అని పేర్కొన్నట్లు కుటుంబ వర్గాలు చెబుతున్నాయి.
ఈ ఘటనపై పోలీసులు కేసు నమోదు చేసి దర్యాప్తు చేపట్టారు. సంభవ్ జైన్ మృతికి దారితీసిన పరిస్థితులు, భరణం వ్యవహారం, చివరి సందేశానికి సంబంధించిన అంశాలను పోలీసులు పరిశీలిస్తున్నారు.
