సౌర విద్యుత్‌ ప్యానళ్లు ఏర్పాటు చేసుకోవాలి
సౌర విద్యుత్‌ ప్యానళ్లు ఏర్పాటు చేసుకోవాలి విద్యుత్‌ శాఖ డీఈ బండి శ్రీనివాసరావు
మధిర: ప్రతి కుటుంబం సౌర విద్యుత్‌ ప్యానళ్లు ఏర్పాటు చేసుకుని విద్యుత్‌ ఖర్చులను తగ్గించుకోవాలని విద్యుత్‌ శాఖ డివిజనల్‌ ఇంజినీర్‌ బండి శ్రీనివాసరావు సూచించారు. సౌర విద్యుత్‌ వినియోగంతో విద్యుత్‌ పొదుపుతో పాటు ఆర్థిక ప్రయోజనాలు పొందవచ్చని తెలిపారు.
తెలంగాణ రాష్ట్రం ఖమ్మం జిల్లా మధిరలోని విద్యుత్‌ శాఖ డివిజన్‌ కార్యాలయ ప్రాంగణంలో గురువారం విద్యుత్‌ శాఖ, రెడ్కో సంస్థ, సంబంధిత బ్యాంకు అధికారుల సంయుక్త ఆధ్వర్యంలో సౌర విద్యుత్‌ ప్యానళ్ల ఏర్పాటుపై అవగాహన, నమోదు కార్యక్రమం నిర్వహించారు.
ఈ సందర్భంగా బండి శ్రీనివాసరావు మాట్లాడుతూ ప్రధానమంత్రి సూర్య ఘర్‌ ముఫ్త్‌ బిజిలీ యోజన పథకం కింద అర్హులైన వినియోగదారులు ఇంటిపై సౌర విద్యుత్‌ ప్లాంట్‌ ఏర్పాటు చేసుకుంటే రూ.78 వేల వరకు సబ్సిడీ పొందవచ్చని వివరించారు. సౌర విద్యుత్‌ ద్వారా ఉత్పత్తి అయ్యే విద్యుత్‌ను నిబంధనలకు అనుగుణంగా విద్యుత్‌ సంస్థకు అందించే అవకాశం ఉంటుందని, దీనివల్ల అదనపు ఆర్థిక ప్రయోజనాలు పొందవచ్చని తెలిపారు.
మధిర విద్యుత్‌ శాఖ డివిజన్‌ కార్యాలయంలో అక్టోబర్ 1 నుంచి 3వ తేదీ వరకు మూడు రోజులపాటు అవగాహన, నమోదు కార్యక్రమం నిర్వహిస్తున్నట్లు వెల్లడించారు. ఆసక్తి ఉన్న వినియోగదారులు ఆధార్‌ కార్డు, పాస్‌పోర్టు సైజు ఫొటో, విద్యుత్‌ బిల్లు, బ్యాంకు పాస్‌బుక్‌తో కార్యాలయానికి వచ్చి నమోదు చేసుకోవాలని సూచించారు.
ఈ కార్యక్రమంలో విద్యుత్‌ శాఖ సిబ్బంది, స్థానిక ప్రజాప్రతినిధులు, రెడ్కో సంస్థ ప్రతినిధులు, బ్యాంకు అధికారులు, విద్యుత్‌ వినియోగదారులు పాల్గొన్నారు.
