గుంటూరులో మహిళా సమస్యల పరిష్కారానికి ప్రత్యేక గ్రీవెన్స్‌.. ఎమ్మెల్యే గళ్ళా మాధవి

ప్రతి గురువారం మహిళల నుంచి అర్జీల స్వీకరణ.. సమస్యల పరిష్కారానికి అధికారులకు ఆదేశాలు గుంటూరు: మహిళలు ఎదుర్కొంటున్న సమస్యలను గుర్తించి వాటికి సత్వర పరిష్కారం చూపడమే లక్ష్యంగా ప్రతి గురువారం ప్రత్యేకంగా మహిళా గ్రీవెన్స్‌ కార్యక్రమాన్ని నిర్వహిస్తున్నట్లు గుంటూరు పశ్చిమ ఎమ్మెల్యే గళ్ళా మాధవి తెలిపారు. గురువారం నియోజకవర్గ కార్యాలయంలో నిర్వహించిన ఈ కార్యక్రమంలో మహిళల నుంచి ఆమె స్వయంగా అర్జీలను స్వీకరించారు. ఈ సందర్భంగా పలువురు మహిళలు ఆర్థిక మోసాలు, రహదారులు, మురుగునీటి కాలువలు, తాగునీటి సమస్యలతో పాటు పోలీసు కేసులు, విద్యార్థుల ధ్రువపత్రాలకు సంబంధించిన సమస్యలను ఎమ్మెల్యే దృష్టికి తీసుకువచ్చారు. ప్రతి అర్జీని పరిశీలించి సంబంధిత అధికారులకు పంపించడంతో పాటు సమస్యల పరిష్కారానికి తక్షణ చర్యలు తీసుకోవాలని ఆదేశించినట్లు ఎమ్మెల్యే వెల్లడించారు. మహిళలు తమ సమస్యలను నిర్భయంగా తెలియజేయాలని, వాటి పరిష్కారానికి ప్రత్యేక ప్రాధాన్యం ఇస్తామని ఆమె తెలిపారు.