రేపటి నుంచి తిరుమలలో శ్రీవారి నవరాత్రి బ్రహ్మోత్సవాలు

తిరుమల: తిరుమల శ్రీవారి నవరాత్రి బ్రహ్మోత్సవాలకు రేపు అంకురార్పణ జరగనుంది. అధిక మాసం కారణంగా తిరుమల తిరుపతి దేవస్థానం (టీటీడీ) ఈ ఏడాది రెండు బ్రహ్మోత్సవాలను నిర్వహిస్తోంది. ఇందులో భాగంగా ఈ నెల 12 నుంచి 20వ తేదీ వరకు నవరాత్రి బ్రహ్మోత్సవాలు వైభవంగా జరగనున్నాయి. దసరా సెలవులతో పాటు పెరటాసి మాసం ముగింపు నేపథ్యంలో తిరుమలకు భక్తుల రద్దీ పెరిగే అవకాశం ఉందని అధికారులు అంచనా వేస్తున్నారు. భక్తులకు ఎలాంటి ఇబ్బందులు కలగకుండా టీటీడీ అధికారులు విస్తృత ఏర్పాట్లు చేపట్టారు. గత నెలలో సాలకట్ల బ్రహ్మోత్సవాలు విజయవంతంగా ముగియగా, తాజాగా నవరాత్రి బ్రహ్మోత్సవాల నిర్వహణకు ఏర్పాట్లు పూర్తి చేస్తున్నారు.