జాన్‌పాకలో అత్యాధునిక రైల్వే అండర్పాస్ ప్రారంభం.. రూ.4.60 కోట్లతో నిర్మాణం
గోవా టన్నెల్‌ను తలపించేలా ప్రత్యేక డిజైన్.. వాహనదారులకు ట్రాఫిక్ కష్టాల నుంచి ఉపశమనం
వరంగల్, నవంబర్ 3 (ఎన్ టుడే న్యూస్): వరంగల్–నర్సంపేట ప్రధాన రహదారిలోని జాన్‌పాక వద్ద రూ.4.60 కోట్ల వ్యయంతో నిర్మించిన అత్యాధునిక రైల్వే అండర్పాస్ అందుబాటులోకి వచ్చింది. ఆధునిక సౌకర్యాలతో నిర్మించిన ఈ అండర్పాస్ ప్రయాణికులకు సౌకర్యవంతమైన రాకపోకలను అందిస్తోంది.
350–400 మీటర్ల పొడవునా ప్రత్యేక నిర్మాణం
సుమారు 350 నుంచి 400 మీటర్ల పొడవునా పైకప్పుతో నిర్మించిన ఈ అండర్‌పాస్‌లో వెలుతురు కోసం ప్రత్యేక రేకులు, హైమాస్ట్ లైట్లు ఏర్పాటు చేశారు. దీంతో రాత్రి వేళల్లోనూ వాహనదారులకు స్పష్టమైన దృశ్యమానత లభించేలా ఏర్పాట్లు చేశారు.
వర్షపు నీరు నిలవకుండా ప్రత్యేక ఏర్పాట్లు
వర్షాకాలంలో అండర్‌పాస్‌లో నీరు నిలిచిపోకుండా సంప్‌, హైకెపాసిటీ మోటార్లను ఏర్పాటు చేశారు. వర్షపు నీటిని వేగంగా బయటకు పంపేలా ఈ వ్యవస్థను రూపొందించారు.
పలు గ్రామాల ప్రజలకు ట్రాఫిక్ కష్టాల నుంచి ఉపశమనం
ఈ అండర్పాస్ అందుబాటులోకి రావడంతో వరంగల్–నర్సంపేట మార్గంలోని పలు గ్రామాల ప్రజలకు రాకపోకలు సులభతరం కానున్నాయి. గతంలో రైల్వే క్రాసింగ్ వద్ద ఎదురయ్యే ట్రాఫిక్ ఇబ్బందులు తగ్గనున్నాయి.
ఫొటోలు, రీల్స్‌తో సందడి
అండర్పాస్ నిర్మాణ శైలి, ప్రత్యేక లైటింగ్‌ గోవా టన్నెల్‌ను తలపించేలా ఉండటంతో ప్రయాణికులు ఆసక్తి చూపుతున్నారు. పలువురు అక్కడ ఫొటోలు, వీడియోలు, రీల్స్‌ తీసుకుంటూ సందడి చేస్తున్నారు. ఆధునిక నిర్మాణంతో జాన్‌పాక అండర్పాస్ స్థానికంగా ప్రత్యేక ఆకర్షణగా నిలుస్తోంది.
