కనకదుర్గమ్మను దర్శించుకున్న తమిళనాడు సీఎం విజయ్

విజయవాడ, అక్టోబర్ 13: దసరా శరన్నవరాత్రి ఉత్సవాల సందర్భంగా తమిళనాడు ముఖ్యమంత్రి విజయ్ మంగళవారం సాయంత్రం విజయవాడ ఇంద్రకీలాద్రిపై కొలువుదీరిన శ్రీ కనకదుర్గమ్మను దర్శించుకున్నారు. అమ్మవారికి ప్రత్యేక పూజలు నిర్వహించారు.

ఇంద్రకీలాద్రికి చేరుకున్న విజయ్‌కు ఆలయ అర్చకులు, విజయవాడ ఎంపీ కేశినేని శివనాథ్, ఆలయ అధికారులు సంప్రదాయబద్ధంగా స్వాగతం పలికి ప్రధాన ఆలయంలోకి తోడ్కొని వెళ్లారు. సంప్రదాయ వస్త్రధారణలో ఆలయానికి వచ్చిన ఆయన, క్యూలైన్లలో ఉన్న భక్తులకు చేతులెత్తి నమస్కరిస్తూ అభివాదం చేశారు. అనంతరం అంతరాలయంలో అమ్మవారిని దర్శించుకుని ప్రత్యేక పూజల్లో పాల్గొన్నారు.

దర్శనం అనంతరం అనివేటి మండపంలో వేద పండితులు విజయ్‌కు వేదాశీర్వచనం అందించారు. ఆంధ్రప్రదేశ్ దేవాదాయ శాఖ కార్యదర్శి కె. కన్నబాబు, కమిషనర్ కె. రామచంద్ర మోహన్, ఆలయ పాలకమండలి చైర్మన్ బొర్రా రాధాకృష్ణ (గాంధీ), కార్యనిర్వహణాధికారి వి.కె. శీనా నాయక్ సంయుక్తంగా అమ్మవారి శేషవస్త్రాలు, ప్రసాదాలు, చిత్రపటాన్ని ఆయనకు అందజేశారు.

ఈ కార్యక్రమంలో దేవస్థాన ధర్మకర్తల మండలి సభ్యులు, ఆలయ అధికారులు, నగర పోలీసు ఉన్నతాధికారులు పాల్గొన్నారు.