ట్యాంక్ బండ్ పై చాకలి ఐలమ్మ విగ్రహాన్ని ప్రతిష్టించాలి

 ప్రజా ప్రభుత్వానికి రజక సంఘం డిమాండ్

​NTODAY NEWS : చిట్యాల 

హైదరాబాద్‌లోని చారిత్రాత్మక ట్యాంక్ బండ్ పై వీరనారి చాకలి ఐలమ్మ విగ్రహాన్ని తక్షణమే ఏర్పాటు చేయాలని నల్గొండ జిల్లా చిట్యాల మండలం వెలిమినేడు గ్రామ రజక సంఘం అధ్యక్షుడు గోలి కిష్టయ్య ప్రజా ప్రభుత్వాన్ని డిమాండ్ చేశారు. ​ఈ సందర్భంగా ఆయన మాట్లాడుతూ తెలంగాణ నేలపై ఎందరో మహానుభావుల విగ్రహాలను ప్రతిష్టించిన ప్రభుత్వం, సాయుధ పోరాట యోధులు ఐలమ్మ విగ్రహ ఏర్పాటు విషయంలో అలసత్వం వహించడం సరికాదని హితవు పలికారు. నిజాం నిరంకుశత్వానికి, భూస్వామ్య వ్యవస్థకు వ్యతిరేకంగా తెలంగాణ సాయుధ పోరాటంలో ఐలమ్మ అందించిన అమూల్యమైన సేవలు, త్యాగాలు చిరస్మరణీయమని కొనియాడారు. తెలంగాణ ఆత్మగౌరవ పోరాటానికి ప్రతీకగా నిలిచిన ఐలమ్మ వీరత్వాన్ని ప్రభుత్వం గుర్తించి, ఆమె స్మారకార్థం ట్యాంక్ బండ్ పై విగ్రహాన్ని ప్రతిష్టించేందుకు తక్షణమే తగిన చర్యలు తీసుకోవాలని ఆయన విజ్ఞప్తి చేశారు.