బీసీలకు 34 శాతం రిజర్వేషన్ల అమలుకు కూటమి ప్రభుత్వం కట్టుబడి ఉంది

బీసీలకు 34 శాతం రిజర్వేషన్ల అమలుకు కూటమి ప్రభుత్వం కట్టుబడి ఉంది: ఎమ్మెల్యే భాష్యం ప్రవీణ్

పెదకూరపాడు: స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పించడం, రాజకీయంగా తగిన ప్రాతినిధ్యం కల్పించే అంశాలపై పెదకూరపాడు ఎమ్మెల్యే భాష్యం ప్రవీణ్ నియోజకవర్గంలోని బీసీ నాయకులతో సమావేశం నిర్వహించారు.

ఈ సందర్భంగా ఎమ్మెల్యే మాట్లాడుతూ బీసీలకు 34 శాతం రిజర్వేషన్లు కల్పించాలనే లక్ష్యంతో కూటమి ప్రభుత్వం ముందుకు సాగుతోందని తెలిపారు. బడుగు, బలహీన వర్గాలకు రాజకీయంగా సముచిత ప్రాతినిధ్యం కల్పించడం తెలుగుదేశం పార్టీ లక్ష్యమని పేర్కొన్నారు.

కోర్టు తీర్పులు అనుకూలంగా లేకపోయినా బీసీలకు 34 శాతం రిజర్వేషన్లు కల్పించే విషయంలో తమ పార్టీ కట్టుబడి ఉందని భాష్యం ప్రవీణ్ అన్నారు. బీసీలకు రాజకీయ అవకాశాలు కల్పించడం, వారి హక్కులను పరిరక్షించడం, రాజకీయ అభ్యున్నతికి తోడ్పడడం వంటి అంశాలకు ప్రాధాన్యం ఇస్తామని తెలిపారు.

స్థానిక సంస్థల్లో బీసీలకు తగిన ప్రాతినిధ్యం లభించేలా కృషి చేస్తామని, ఈ విషయంలో బీసీ నాయకులు, కార్యకర్తలు తమ అభిప్రాయాలను తెలియజేయాలని సమావేశంలో చర్చించినట్లు పేర్కొన్నారు.

ఈ సమావేశంలో నియోజకవర్గంలోని ఐదు మండలాల పార్టీ అధ్యక్షులు, బీసీ ముఖ్య నాయకులు పాల్గొన్నారు.