9 క్యారెట్ల బంగారానికి పెరుగుతున్న ఆదరణ

పెరుగుతున్న పసిడి ధరల నేపథ్యంలో తక్కువ బడ్జెట్ ఆభరణాలపై వినియోగదారుల ఆసక్తి

హైదరాబాద్ (ఎన్ టుడే న్యూస్): బంగారం ధరలు భారీగా పెరుగుతుండటంతో సామాన్యులు ప్రత్యామ్నాయంగా 9 క్యారెట్ల బంగారం ఆభరణాలపై ఆసక్తి చూపుతున్నారు. తక్కువ ధరకు బంగారు ఆభరణాలను కొనుగోలు చేసే అవకాశం ఉండటంతో వీటికి ఆదరణ పెరుగుతున్నట్లు సమాచారం.

ప్రస్తుతం 22 క్యారెట్ల 10 గ్రాముల బంగారం ధర సుమారు రూ.1.31 లక్షల వరకు ఉండగా, 9 క్యారెట్ల బంగారం ధర సుమారు రూ.54 వేలుగా ఉందని పేర్కొంటున్నారు. ధరల్లో వ్యత్యాసం కారణంగా తక్కువ బడ్జెట్‌లో ఆభరణాలు కొనుగోలు చేయాలనుకునే వారికి 9 క్యారెట్ల బంగారం ఒక ప్రత్యామ్నాయంగా మారుతోంది.

ముఖ్యంగా హాల్‌మార్కింగ్‌తో కూడిన 9 క్యారెట్ల ఆభరణాలపై వినియోగదారులు ఆసక్తి చూపుతున్నారు. గతంలో ఎక్కువ బరువుతో ఆభరణాలు కొనుగోలు చేయాలని భావించిన వారు సైతం ప్రస్తుతం తమ బడ్జెట్‌కు అనుగుణంగా తక్కువ బరువున్న ఆభరణాలను ఎంచుకుంటున్నట్లు సమాచారం. మూడు తులాల ఆభరణాలు కొనుగోలు చేయాలనుకునే వారు కూడా 4 నుంచి 10 గ్రాముల మధ్య బరువున్న ఆభరణాల వైపు మొగ్గు చూపుతున్నట్లు తెలుస్తోంది.

అయితే 9 క్యారెట్ల బంగారంలో స్వచ్ఛమైన బంగారం శాతం 22 క్యారెట్లతో పోలిస్తే తక్కువగా ఉంటుంది. అందువల్ల కొనుగోలు చేసే ముందు క్యారెట్ వివరాలు, హాల్‌మార్కింగ్, ధర, తయారీ ఛార్జీలను పరిశీలించాలని వినియోగదారులకు సూచిస్తున్నారు.