యూరోపియన్ పార్లమెంట్‌లో ది ఆరెంజ్ ప్లేగ్ శిల్పం
స్ట్రాస్‌బర్గ్: ఫ్రాన్స్‌లోని స్ట్రాస్‌బర్గ్‌లో ఉన్న యూరోపియన్ పార్లమెంట్ భవనంలో అమెరికా అధ్యక్షుడు డొనాల్డ్ ట్రంప్‌ను వ్యంగ్యంగా చిత్రీకరించిన బంగారు పూతతో కూడిన శిల్పం ఏర్పాటు చేయడం చర్చనీయాంశంగా మారింది. డానిష్ కళాకారుడు జెన్స్ గాల్షియోట్ రూపొందించిన ఈ శిల్పానికి ‘ది ఆరెంజ్ ప్లేగ్’ అనే పేరు పెట్టారు.
23 క్యారెట్ల గోల్డ్ కోటెడ్‌గా రూపొందించిన ఈ శిల్పంలో ట్రంప్‌ను నగ్నంగా, బలహీనమైన వ్యక్తి భుజాలపై కూర్చున్నట్లుగా చిత్రీకరించారు. ఈ శిల్పాన్ని ‘కింగ్ ఆఫ్ ఇన్‌జస్టిస్’ అని కూడా పిలుస్తున్నట్లు సమాచారం.
సామాజిక, రాజకీయ అంశాలపై వ్యంగ్యాత్మక కళాకృతులను రూపొందించే గాల్షియోట్, ఈ శిల్పం ద్వారా అధికారంలో ఉన్న వ్యక్తులు సామాన్య ప్రజలపై మోపే భారాన్ని ప్రతిబింబించే ప్రయత్నం చేసినట్లు పేర్కొంటున్నారు.
శిల్పం కింద ఉంచిన సందేశంలో కూడా వ్యంగ్య ధోరణిలో వ్యాఖ్యలు ఉన్నాయి. అధికారం, ప్రజలపై భారం, రాజకీయ నాయకుల హామీల మధ్య ఉన్న వైరుధ్యాన్ని ప్రశ్నించే విధంగా ఈ సందేశాన్ని రూపొందించారు.
యూరోపియన్ పార్లమెంట్ భవనంలో ఈ కళాకృతిని ఏర్పాటు చేయడం ద్వారా రాజకీయ అధికారంపై కళారూపంలో విమర్శను వ్యక్తం చేసినట్లు తెలుస్తోంది. ఈ శిల్పంపై ప్రస్తుతం సామాజిక, రాజకీయ వర్గాల్లో చర్చ కొనసాగుతోంది.
