మార్కాపురం జిల్లాలో భారీ చోరీ :

అర్ధవీడు: మార్కాపురం జిల్లా అర్ధవీడు మండలం మావుటూరు గ్రామంలో చోరీ ఘటన చోటుచేసుకుంది. ఇంటికి తాళం వేసి పొలానికి వెళ్లిన సమయంలో దుండగులు తాళాలు పగలగొట్టి బంగారం, నగదును అపహరించారు.

గ్రామానికి చెందిన ఆవులయ్య ఉపాధ్యాయుడిగా పనిచేసి పదవీ విరమణ పొందారు. గురువారం ఆయన భార్యతో కలిసి పొలానికి వెళ్లారు. ఇదే అదునుగా భావించిన దుండగులు ఇంటి తాళాలు పగలగొట్టి లోపలికి ప్రవేశించారు.

అనంతరం బీరువాలో ఉన్న 12 తులాల బంగారు ఆభరణాలతో పాటు రూ.లక్ష నగదును అపహరించినట్లు సమాచారం. పొలం నుంచి ఇంటికి తిరిగి వచ్చిన ఆవులయ్య చోరీ జరిగినట్లు గుర్తించి పోలీసులకు సమాచారం అందించారు.

సమాచారం అందుకున్న పోలీసులు కేసు నమోదు చేసి దర్యాప్తు చేపట్టారు. చోరీకి పాల్పడిన వ్యక్తులను గుర్తించేందుకు పోలీసులు విచారణ కొనసాగిస్తున్నారు.