ప్రతీకార రాజకీయాలకు తావులేదు.. అభివృద్ధే మా అజెండా
ప్రతీకార రాజకీయాలకు తావులేదు.. అభివృద్ధే మా అజెండా: ఎమ్మెల్యే భూమా అఖిలప్రియ
ఆళ్లగడ్డ: తమ ప్రభుత్వం ప్రతీకార రాజకీయాలకు తావివ్వదని, వైఎస్సార్ కాంగ్రెస్ పార్టీ నాయకులు, కార్యకర్తలపై ఎక్కడా తప్పుడు కేసులు నమోదు చేయలేదని ఎమ్మెల్యే భూమా అఖిలప్రియ అన్నారు. శనివారం ఆళ్లగడ్డలో మీడియాతో మాట్లాడిన ఆమె ఈ వ్యాఖ్యలు చేశారు.
గతంలో తమపై కేసులు నమోదైనప్పటికీ, అధికారంలోకి వచ్చిన తర్వాత ఎవరినీ రాజకీయ కక్షతో వేధించలేదని ఆమె పేర్కొన్నారు. ప్రజాస్వామ్యంలో రాజకీయ భేదాభిప్రాయాలు సహజమని, పాలనలో ప్రజా సంక్షేమానికి ప్రాధాన్యం ఇవ్వాలన్నదే తమ ఉద్దేశమని తెలిపారు.
రానున్న స్థానిక సంస్థల ఎన్నికల్లో తమ ప్రభుత్వం చేపట్టిన అభివృద్ధి పనులు, అమలు చేసిన సంక్షేమ కార్యక్రమాలను ప్రజలకు వివరిస్తామని భూమా అఖిలప్రియ చెప్పారు. చేసిన పనులను వివరించి ధైర్యంగా ప్రజలను ఓట్లు అడుగుతామని పేర్కొన్నారు.
