సిద్దిపేట జిల్లాలో ముగ్గురు జూనియర్ లెక్చరర్లపై వేటు
సిద్దిపేట: నకిలీ విద్యార్హత ధ్రువపత్రాలు సమర్పించినట్లు నిర్ధారణ కావడంతో రాష్ట్రవ్యాప్తంగా 35 మంది ప్రభుత్వ జూనియర్ లెక్చరర్లపై ఇంటర్మీడియట్ విద్యాశాఖ చర్యలు తీసుకుంది. వీరి నియామకాలను రద్దు చేస్తూ అధికారులు ఉత్తర్వులు జారీ చేశారు. సిద్దిపేట జిల్లాకు చెందిన ముగ్గురు జూనియర్ లెక్చరర్లు కూడా ఈ జాబితాలో ఉన్నారు.
సిద్దిపేట జిల్లాలోని గజ్వేల్ ప్రభుత్వ జూనియర్ కళాశాల లెక్చరర్ ఎం.డి. అష్రఫ్ హుస్సేన్, చేర్యాల ప్రభుత్వ జూనియర్ కళాశాల లెక్చరర్ పరశురాములు ల్యాగల, చిన్నకోడూరు ప్రభుత్వ జూనియర్ కళాశాల లెక్చరర్ జి. ప్రసాద్పై చర్యలు తీసుకున్నట్లు సమాచారం.
రాష్ట్రంలో గతంలో కాంట్రాక్ట్ పద్ధతిలో పనిచేసిన జూనియర్ లెక్చరర్లను 2023లో రెగ్యులరైజ్ చేశారు. ఈ ప్రక్రియలో సమర్పించిన విద్యార్హత ధ్రువపత్రాలపై అనుమానాలు రావడంతో ఇంటర్మీడియట్ విద్యాశాఖ వాటిని సంబంధిత విశ్వవిద్యాలయాలకు పంపి పరిశీలించింది. కొంతమంది లెక్చరర్లు సమర్పించిన పీజీ, బీటెక్ తదితర ధ్రువపత్రాలు ఆయా విశ్వవిద్యాలయాలు జారీ చేసినవి కావని నిర్ధారణ కావడంతో చర్యలకు శ్రీకారం చుట్టింది.
ధ్రువపత్రాలపై అనుమానాలు ఉన్న లెక్చరర్లకు అధికారులు షోకాజ్ నోటీసులు జారీ చేసి వివరణ కోరారు. వచ్చిన వివరణలను పరిశీలించిన అనంతరం సంతృప్తికరంగా లేవని తేలిన వారిపై నియామకాలను రద్దు చేస్తూ చర్యలు తీసుకున్నారు.
ఇదిలా ఉండగా, రాష్ట్రవ్యాప్తంగా మరికొందరు జూనియర్ లెక్చరర్ల విద్యార్హత ధ్రువపత్రాలపైనా పరిశీలన కొనసాగుతున్నట్లు సమాచారం. దాదాపు 320 మంది లెక్చరర్ల సర్టిఫికెట్లను సంబంధిత విశ్వవిద్యాలయాల ద్వారా వెరిఫికేషన్ చేస్తున్నట్లు నివేదికలు పేర్కొంటున్నాయి.
