మూడేళ్ల పొదుపు.. రూ.10 నాణేలతో కొత్త స్కూటీ కొనుగోలు

మంచిర్యాల జిల్లా లక్షెట్టిపేటలో ఆసక్తికర ఘటన చోటుచేసుకుంది. స్థానిక చర్చిలో పాస్టర్‌గా పనిచేస్తున్న రవి జోసెఫ్ తనకు ఇష్టమైన స్కూటీని కొనుగోలు చేసేందుకు వినూత్నంగా పొదుపు చేశారు. కూరగాయలు, నిత్యావసర వస్తువులు కొనుగోలు చేసినప్పుడు మిగిలే చిల్లరను దాచుకుంటూ వచ్చారు. ఇలా గత మూడేళ్లుగా కేవలం రూ.10 నాణేలను పొదుపు చేస్తూ మొత్తం రూ.1.23 లక్షలు జమ చేశారు. అనంతరం ఆ మొత్తాన్ని తీసుకుని షోరూమ్‌కు వెళ్లి తాను కోరుకున్న కొత్త స్కూటీని కొనుగోలు చేశారు. అయితే, ఆయన తీసుకొచ్చిన నాణేలను లెక్కించేందుకు షోరూమ్‌ సిబ్బందికి సుమారు రెండు గంటల సమయం పట్టింది. చిన్న మొత్తాలను క్రమం తప్పకుండా పొదుపు చేస్తే పెద్ద లక్ష్యాలను కూడా చేరుకోవచ్చని రవి జోసెఫ్ చేసిన ఈ ప్రయత్నం చాటిచెబుతోంది.