న్యాయవాదుల రక్షణ చట్టం కోసం తిరువూరు న్యాయవాదుల పోరాటం

రెండో రోజుకు చేరిన రిలే నిరాహార దీక్ష

తిరువూరు: న్యాయవాదుల రక్షణ చట్టాన్ని అమలు చేయాలని డిమాండ్ చేస్తూ తిరువూరు న్యాయవాదులు చేపట్టిన రిలే నిరాహార దీక్ష రెండో రోజు కొనసాగింది. కృష్ణా జిల్లా బార్ ఫెడరేషన్ పిలుపు మేరకు తిరువూరు కోర్టు ప్రాంగణంలో ఏర్పాటు చేసిన దీక్షా శిబిరంలో న్యాయవాదులు నిరసన తెలిపారు. న్యాయవాదులపై దాడులు, బెదిరింపులు, అక్రమ కేసుల నుంచి రక్షణ కల్పించేందుకు ప్రత్యేక చట్టాన్ని తీసుకురావాలని వారు డిమాండ్ చేశారు.

రెండో రోజు రిలే నిరాహార దీక్షలో న్యాయవాదులు మర్స కట్ల కుమారు, గుండాల భాస్కర్, ఉల్లియా వెదుళ్ల వెంకటేశ్వరరావు, మాళావత్ రాము, భూక్య రామారావు పాల్గొన్నారు. ఈ సందర్భంగా తిరువూరు బార్ అసోసియేషన్ అధ్యక్షుడు సంకురాత్రి జనార్ధనరావు, ప్రధాన కార్యదర్శి గోగిరెడ్డి కృష్ణారెడ్డి, కార్యదర్శి కనపర్తి రాంబాబుతో పాటు పలువురు సీనియర్ న్యాయవాదులు దీక్షా శిబిరానికి హాజరై సంఘీభావం తెలిపారు.

సీనియర్ న్యాయవాదులు రేగళ్ల మోహన్‌రెడ్డి, మాకరాజు రామ్మోహన్‌రాజు, అంకిరెడ్డి అజన్‌రెడ్డి, అత్తులూరి శ్రీనివాసరావు, మొగపర్తి సత్యం, కొత్తపల్లి ఆనంద్ స్వరూప్, రావురి నాగరాజు, కిలారు హనుమంతరావు, పరిషా రామలింగేశ్వరరావు, చిలకా హేమంత్, కారుమంచి సునీల్, మన్నే వెంకటేశ్వరరావు తదితరులు పాల్గొని న్యాయవాదుల పోరాటానికి మద్దతు ప్రకటించారు. సీనియర్, జూనియర్ న్యాయవాదులు పెద్ద సంఖ్యలో ఈ కార్యక్రమంలో పాల్గొన్నారు.

న్యాయవాదుల భద్రతకు ప్రత్యేక చట్టం అవసరం

న్యాయవాదులు తమ విధులను స్వేచ్ఛగా, నిర్భయంగా నిర్వహించేందుకు తగిన రక్షణ అవసరమని ఈ సందర్భంగా వారు పేర్కొన్నారు. విధి నిర్వహణలో ఎదురయ్యే దాడులు, బెదిరింపులు, ఇతర వేధింపుల నుంచి న్యాయవాదులకు చట్టపరమైన రక్షణ కల్పించాలని కోరారు. న్యాయవాదుల భద్రతకు ప్రత్యేక చట్టం అమలు చేయడం ద్వారా వారి హక్కులను పరిరక్షించడంతో పాటు న్యాయవ్యవస్థపై ప్రజలకు విశ్వాసం మరింత బలపడుతుందని అభిప్రాయపడ్డారు.

న్యాయవాదుల రక్షణ చట్టం అమలయ్యే వరకు తమ డిమాండ్‌ను ప్రభుత్వం దృష్టికి తీసుకెళ్లేందుకు వివిధ రూపాల్లో నిరసన కార్యక్రమాలు కొనసాగిస్తామని న్యాయవాదులు స్పష్టం చేశారు. న్యాయవాదుల ఐక్యతను చాటుతూ, వారి హక్కులు మరియు భద్రత పరిరక్షణే ప్రధాన లక్ష్యంగా రిలే నిరాహార దీక్ష కొనసాగుతోంది.