మధుమేహ నియంత్రణకు అప్రమత్తతే అసలైన ఆయుధం

ఆహారపు అలవాట్లు, జీవనశైలిలో మార్పులతోనే వ్యాధికి అడ్డుకట్ట గుంటూరు సీ.జీ.హెచ్.ఎస్. వైద్యాధికారులు 

మధుమేహ నియంత్రణకు అప్రమత్తతే అసలైన ఆయుధం ఆహారపు అలవాట్లు, జీవనశైలిలో మార్పులతోనే వ్యాధికి అడ్డుకట్ట గుంటూరు సీ.జీ.హెచ్.ఎస్. వైద్యాధికారులు డాక్టర్ కొండా నాగార్జున, డాక్టర్ దాసరి రమేష్

గుంటూరు: మారుతున్న జీవనశైలి, ఆహారపు అలవాట్లు, శారీరక శ్రమ తగ్గిపోవడం వల్ల మధుమేహం వేగంగా విస్తరిస్తోందని, ఈ వ్యాధి నియంత్రణకు ప్రతి ఒక్కరూ అప్రమత్తంగా ఉండాలని గుంటూరు సెంట్రల్ గవర్నమెంట్ హెల్త్ స్కీం (సీ.జీ.హెచ్.ఎస్.) చీఫ్ మెడికల్ ఆఫీసర్లు డాక్టర్ కొండా నాగార్జున, డాక్టర్ దాసరి రమేష్ సూచించారు. ప్రపంచ మధుమేహ దినోత్సవాన్ని పురస్కరించుకుని శనివారం గుంటూరు నగరం పాలెంలోని సీ.జీ.హెచ్.ఎస్. వెల్‌నెస్ సెంటర్‌లో ప్రత్యేక వైద్య శిబిరం నిర్వహించారు. ఈ సందర్భంగా వైద్యాధికారులు మాట్లాడుతూ మధుమేహం వయసుతో సంబంధం లేకుండా అన్ని వర్గాల వారినీ ప్రభావితం చేసే సమస్యగా మారుతోందన్నారు. రోజువారీ ఆహారంలో అధిక చక్కెర, కొవ్వు పదార్థాలను తగ్గించుకోవాలని, రుచికి ప్రాధాన్యత ఇస్తూ ఆరోగ్యాన్ని నిర్లక్ష్యం చేయవద్దని సూచించారు. హోటళ్లు, రెస్టారెంట్లలో రాగులు, జొన్నలు, సజ్జలు, కొర్రలు వంటి చిరుధాన్యాలతో తయారుచేసిన వంటకాలను అందుబాటులోకి తీసుకురావాలని అభిప్రాయపడ్డారు. ఫాస్ట్‌ఫుడ్‌ వల్ల కలిగే అనారోగ్య ప్రభావాలపై ప్రజలకు అవగాహన కల్పించేలా ఆహార పదార్థాల ప్యాకేజీలపై హెచ్చరికలు ముద్రించే విధానం అమలు చేయాలని సూచించారు. ప్రతిరోజూ నడక, వ్యాయామం, బరువు నియంత్రణతో పాటు చురుకైన జీవనశైలిని అలవర్చుకోవాలని తెలిపారు. మధుమేహం ప్రారంభ దశలో ఎలాంటి లక్షణాలు కనిపించకపోవచ్చని, కుటుంబంలో మధుమేహ చరిత్ర ఉన్నవారు, అధిక బరువుతో బాధపడేవారు క్రమం తప్పకుండా రక్తపరీక్షలు చేయించుకోవాలని స్పష్టం చేశారు. అనంతరం సీ.జీ.హెచ్.ఎస్. లబ్ధిదారులకు రక్తపరీక్షలు నిర్వహించి, అవసరమైన మందులను పంపిణీ చేశారు. ఈ సందర్భంగా స్థానిక సలహా మండలి సభ్యులు గుమ్మడి సీతారామయ్య చౌదరి, కట్టా వెంకటేశ్వర్లు చిరుధాన్యాలను ఉచితంగా అందజేశారు. కార్యక్రమంలో ఫార్మసిస్టులు కౌసల్య, ఆయేషా, సునీల్, సీనియర్ నర్సింగ్ అధికారి హేమసుందరి, వైద్య సిబ్బంది పేరేశ్వరరావు, మురళీ, రామారావు తదితరులు పాల్గొన్నారు.