మామునూర్లో 108 సిబ్బంది వైద్య అవగాహన డెమో
వరంగల్, సెప్టెంబర్ 25: మామునూర్ పోలీస్ ట్రైనింగ్ కాలేజీలో నిర్వహిస్తున్న కంబైన్డ్ యాన్యువల్ ట్రైనింగ్ క్యాంప్-7లో భాగంగా 108 సిబ్బంది వైద్య అవగాహన కార్యక్రమాన్ని నిర్వహించారు.
క్యాంప్ కమాండెంట్ లెఫ్టినెంట్ కల్నల్ డి.వి. సంతోష్ మెహర్, డిప్యూటీ క్యాంప్ కమాండెంట్ లెఫ్టినెంట్ కల్నల్ విజయకుమార్ టి. ఆధ్వర్యంలో 108 సిబ్బంది వివిధ అత్యవసర వైద్య సేవలపై డెమో నిర్వహించారు.
ఈ సందర్భంగా సీపీఆర్ (CPR), ఏఈడీ (AED), ప్రథమ చికిత్స వంటి అత్యవసర వైద్య విధానాలపై అవగాహన కల్పించారు. అలాగే రక్తపోటు, రక్తంలో ఆక్సిజన్ శాతం, శ్వాస రేటు, నాడీ స్పందన వంటి ముఖ్యమైన ఆరోగ్య పరామితులను ఎలా పరిశీలించాలనే అంశాలను వివరించారు.
అత్యవసర పరిస్థితుల్లో ప్రాథమిక వైద్య సహాయం అందించేందుకు అవసరమైన విధానాలను ప్రదర్శన ద్వారా వివరించారు. కార్యక్రమంలో శిక్షణ శిబిర అధికారులు, ఎన్సీసీ సిబ్బంది, సంబంధిత సిబ్బంది పాల్గొన్నారు.
