2027లో ఐదు రాష్ట్రాల అసెంబ్లీ ఎన్నికలు.. షెడ్యూల్‌పై ఈసీ కసరత్తు

జనవరి తొలి లేదా రెండో వారంలో ఎన్నికల షెడ్యూల్ విడుదలయ్యే అవకాశం

దేశంలో మరోసారి అసెంబ్లీ ఎన్నికల సందడి నెలకొననుంది. 2027లో ఐదు రాష్ట్రాల్లో అసెంబ్లీ ఎన్నికలు నిర్వహించేందుకు కేంద్ర ఎన్నికల సంఘం ముందస్తు ఏర్పాట్లపై దృష్టి సారించింది. ఉత్తరప్రదేశ్, ఉత్తరాఖండ్, పంజాబ్, గోవా, మణిపూర్ రాష్ట్రాల అసెంబ్లీలకు ఎన్నికలు నిర్వహించేందుకు అవసరమైన కార్యాచరణను సిద్ధం చేస్తున్నట్లు సమాచారం. 2027 జనవరి మొదటి లేదా రెండో భాగంలో ఐదు రాష్ట్రాల ఎన్నికల షెడ్యూల్ విడుదలయ్యే అవకాశం ఉందని తెలుస్తోంది. ఫిబ్రవరి, మార్చి నెలల్లో ఎన్నికల ప్రక్రియను పూర్తి చేసేలా ఎన్నికల సంఘం ప్రణాళికలు రూపొందిస్తున్నట్లు సమాచారం. ఇందులో భాగంగా ఆయా రాష్ట్రాల్లో ఓటర్ల జాబితా ప్రత్యేక సమగ్ర సవరణ (ఎస్‌ఐఆర్‌) ప్రక్రియతో పాటు ఎలక్ట్రానిక్ ఓటింగ్ యంత్రాల (ఈవీఎంల) తనిఖీలను వేగవంతం చేస్తున్నట్లు తెలుస్తోంది. ఎన్నికల నిర్వహణకు అవసరమైన సిబ్బంది, పోలింగ్ కేంద్రాలు, భద్రతా ఏర్పాట్లపై కూడా దృష్టి సారించే అవకాశం ఉంది. అయితే ఎన్నికల తేదీలు, పూర్తి షెడ్యూల్‌పై కేంద్ర ఎన్నికల సంఘం అధికారిక ప్రకటన వెలువడాల్సి ఉంది.