ఒకే చెట్టుకు వేలాడుతూ ఇద్దరు బాలికల మృతదేహాలు

ఉత్తరప్రదేశ్‌లోని షాజహాన్‌పూర్ జిల్లాలో ఘటన.. మృతికి గల కారణాలపై పోలీసుల దర్యాప్తు

షాజహాన్‌పూర్, నవంబర్ 9 (ఎన్ టుడే న్యూస్):

ఉత్తరప్రదేశ్‌లోని షాజహాన్‌పూర్ జిల్లాలో విషాదకర ఘటన చోటుచేసుకుంది. నిగోహి పోలీస్‌స్టేషన్ పరిధిలోని హరైయా గ్రామంలో సోమవారం ఉదయం 17, 15 ఏళ్ల వయసున్న ఇద్దరు బాలికల మృతదేహాలు ఒకే జామచెట్టుకు వేలాడుతూ కనిపించాయి. ఈ ఘటనతో గ్రామంలో కలకలం రేగింది.

గ్రామస్తులు ఉదయం పొలాల వైపు వెళ్తున్న సమయంలో చెట్టుకు వేలాడుతున్న మృతదేహాలను గుర్తించారు. వెంటనే పోలీసులకు సమాచారం అందించడంతో పోలీసులు, ఫోరెన్సిక్ బృందం ఘటనా స్థలానికి చేరుకున్నాయి. పరిసరాలను పరిశీలించి ఆధారాలు సేకరించడంతో పాటు విచారణ ప్రారంభించాయి.

ప్రాథమిక విచారణలో మృతులిద్దరూ దగ్గరి బంధువులని, మంచి స్నేహితులని పోలీసులు గుర్తించినట్లు సమాచారం. ఇద్దరూ సోషల్ మీడియాలో రీల్స్ పోస్టు చేసేవారని, వారి ఇళ్ల మధ్య కూడా కొద్ది దూరమే ఉందని తెలిసింది.

పోలీసులు ఇద్దరి మృతదేహాలను పోస్టుమార్టం నిమిత్తం ఆసుపత్రికి తరలించారు. అయితే బాలికల మరణాలకు గల అసలు కారణం ఇంకా వెల్లడికాలేదు. ఘటనకు సంబంధించిన అన్ని కోణాల్లో పోలీసులు దర్యాప్తు చేస్తున్నారు.

పోస్టుమార్టం నివేదిక వచ్చిన తర్వాత మరణాలకు సంబంధించిన మరిన్ని వివరాలు వెల్లడయ్యే అవకాశం ఉంది. ప్రస్తుతం ఈ ఘటనకు దారితీసిన పరిస్థితులపై పోలీసులు ఆధారాలు సేకరిస్తున్నారు.