అర్హులైన పేదలకే ఇందిరమ్మ ఇళ్లు కేటాయించాలి

పారదర్శకంగా సర్వే నిర్వహించి నిజమైన లబ్ధిదారులను గుర్తించాలి: సీపీఎం మండల కార్యదర్శి ఇసంపల్లి సైదులు

నెల్లికుదురు, అక్టోబర్ 09 (ఎన్ టుడే న్యూస్):

మండలంలోని వివిధ గ్రామాల్లో ప్రభుత్వం కేటాయిస్తున్న ఇందిరమ్మ ఇళ్లను అర్హులైన నిరుపేదలకు మాత్రమే అందించాలని సీపీఎం మండల కార్యదర్శి ఇసంపల్లి సైదులు అధికారులను కోరారు. ఇందిరమ్మ ఇళ్ల లబ్ధిదారుల ఎంపిక ప్రక్రియను పారదర్శకంగా నిర్వహించి, క్షేత్రస్థాయిలో సమగ్ర సర్వే చేపట్టి నిజమైన అర్హులను గుర్తించాలని డిమాండ్ చేశారు. ఈ మేరకు సోమవారం మండల కేంద్రంలో నిర్వహించిన ప్రజావాణి కార్యక్రమంలో అధికారులకు వినతిపత్రం సమర్పించారు.

అనంతరం సైదులు మాట్లాడుతూ మండలంలోని పలు గ్రామాల్లో సొంత ఇళ్లు లేని నిరుపేద కుటుంబాలు ఇప్పటికీ ఇబ్బందులు ఎదుర్కొంటున్నాయని పేర్కొన్నారు. కొంతమందికి ఇంటి స్థలాలు ఉన్నప్పటికీ ఆర్థిక పరిస్థితులు అనుకూలించక ఇళ్లను నిర్మించుకోలేక కిరాయి ఇళ్లలో నివసిస్తున్నారని తెలిపారు. అలాంటి కుటుంబాలను గుర్తించి ఇందిరమ్మ ఇళ్ల పథకం ద్వారా ఆదుకోవాల్సిన అవసరం ఉందన్నారు.

లబ్ధిదారుల ఎంపిక సమయంలో కుటుంబాల ఆర్థిక స్థితిగతులు, నివాస పరిస్థితులు, సొంత ఇల్లు ఉందా లేదా అనే అంశాలను క్షేత్రస్థాయిలో పరిశీలించాలని కోరారు. రాజకీయాలకు అతీతంగా, ఎలాంటి పక్షపాతం లేకుండా అర్హత ప్రాతిపదికన లబ్ధిదారులను ఎంపిక చేయాలని సూచించారు.

రెండో విడత ఇందిరమ్మ ఇళ్ల మంజూరు ప్రక్రియను అధికారులు మరోసారి సమీక్షించాలని, అర్హులైన పేదలకు ప్రాధాన్యతనిస్తూ ఇళ్లు కేటాయించాలని ప్రభుత్వాన్ని డిమాండ్ చేశారు. అర్హత లేని వారికి ఇళ్లు మంజూరు చేసి, నిజమైన నిరుపేదలకు అన్యాయం జరిగితే పేదలతో కలిసి నిరాహార దీక్షలు చేపడతామని ఇసంపల్లి సైదులు హెచ్చరించారు.