బహిరంగ ప్రదేశంలో మద్యం సేవిస్తున్న తొమ్మిది మందిపై కేసు నమోదు

రెండు వాహనాలు స్వాధీనం చేసుకున్న వలిగొండ పోలీసులు

యాదాద్రి భువనగిరి జిల్లా, వలిగొండ, నవంబర్ 9 (ఎన్ టుడే న్యూస్):

బహిరంగ ప్రదేశంలో మద్యం సేవిస్తూ ప్రజలకు ఇబ్బందులు కలిగిస్తున్న తొమ్మిది మందిపై వలిగొండ పోలీసులు కేసు నమోదు చేశారు. ఈ ఘటన వలిగొండ పోలీస్ స్టేషన్ పరిధిలోని ప్రొద్దుటూరు–ఎదుళ్లగూడెం గ్రామ శివారులో చోటుచేసుకుంది.

పోలీసుల వివరాల ప్రకారం.. గ్రామ శివారులోని బహిరంగ ప్రదేశంలో తొమ్మిది మంది వ్యక్తులు మద్యం సేవిస్తూ ప్రజలకు ఇబ్బందులు కలిగిస్తున్నట్లు గుర్తించారు. దీంతో వారిపై చట్టపరమైన చర్యలు తీసుకుంటూ కేసు నమోదు చేశారు. ఈ సందర్భంగా వారి వద్ద ఉన్న రెండు వాహనాలను పోలీసులు స్వాధీనం చేసుకున్నారు.

బహిరంగ ప్రదేశాల్లో మద్యం సేవించడం, ప్రజలకు ఇబ్బందులు కలిగించే విధంగా వ్యవహరించడం చట్టరీత్యా నేరమని వలిగొండ ఎస్సై శ్రీకాంత్ రెడ్డి తెలిపారు. ఇలాంటి చర్యలకు పాల్పడే వారిపై చట్టప్రకారం కఠిన చర్యలు తీసుకుంటామని హెచ్చరించారు. ప్రజలకు అసౌకర్యం కలిగించకుండా ప్రతి ఒక్కరూ బాధ్యతాయుతంగా వ్యవహరించాలని సూచించారు.