ఎస్ఐఆర్ ట్రైబ్యునల్‌కు మరో రిటైర్డ్ జడ్జి రాజీనామా

38 లక్షల అప్పీళ్ల పరిష్కారంపై ఆందోళన.. ఇప్పటికే నలుగురు న్యాయమూర్తుల వైదొలగింపు కలకత్తా,నవంబర్ 9: పశ్చిమ బెంగాల్‌లో ఓటర్ల జాబితాల ప్రత్యేక సమగ్ర సవరణ (ఎస్ఐఆర్) ప్రక్రియకు సంబంధించిన అప్పీళ్ల విచారణలో కీలక పరిణామం చోటుచేసుకుంది. అప్పీళ్లను పరిశీలించేందుకు ఏర్పాటు చేసిన ట్రైబ్యునల్ నుంచి కలకత్తా హైకోర్టు విశ్రాంత న్యాయమూర్తి బిశ్వజిత్ బసు రాజీనామా చేశారు. వ్యక్తిగత కారణాలతో బాధ్యతల నుంచి తప్పుకుంటున్నట్లు ఆయన ప్రకటించారు. దీంతో ఇప్పటివరకు ఈ ట్రైబ్యునళ్ల నుంచి వైదొలిగిన న్యాయమూర్తుల సంఖ్య నాలుగుకు చేరింది. 38 లక్షల అప్పీళ్లు పెండింగ్‌లో పశ్చిమ బెంగాల్‌లో ఎస్ఐఆర్ ప్రక్రియలో భాగంగా ఓటర్ల జాబితా నుంచి పేర్లు తొలగించడంపై పెద్ద సంఖ్యలో అభ్యంతరాలు, అప్పీళ్లు దాఖలయ్యాయి. వీటిని విచారించేందుకు కేంద్ర ఎన్నికల సంఘం 19 అప్పీలేట్ ట్రైబ్యునళ్లను ఏర్పాటు చేసింది. అయితే మొత్తం 38 లక్షల అప్పీళ్లు పెండింగ్‌లో ఉండటంతో వాటి పరిష్కారంపై ఆందోళనలు వ్యక్తమవుతున్నాయి. లక్షల సంఖ్యలో దరఖాస్తులను పరిమిత సమయంలో విచారించడం సవాలుగా మారిందనే అభిప్రాయాలు వినిపిస్తున్నాయి. పనితీరుపై గతంలోనే అసంతృప్తి ట్రైబ్యునళ్ల పనితీరుపై బిశ్వజిత్ బసు గతంలోనే అసంతృప్తి వ్యక్తం చేశారు. ప్రస్తుత విధానంలో లక్షల కేసులను పరిష్కరించడం కష్టమని, అయితే సుప్రీంకోర్టు ఆదేశాల మేరకు ఈ ప్రక్రియ చేపట్టినందున పూర్తి చేయాల్సిన బాధ్యత ఉందని ఆయన పేర్కొన్నారు. తన రాజీనామా లేఖను కలకత్తా హైకోర్టు ప్రధాన న్యాయమూర్తి రవీంద్ర విఠల్‌రావు ఘుగేకు పంపించారు. మరోవైపు రాష్ట్ర ప్రభుత్వం బసును సంస్థాగత అవినీతి నిరోధక కమిషన్ ఛైర్మన్‌గా నియమించినట్లు సమాచారం. ఇప్పటికే ముగ్గురు న్యాయమూర్తుల రాజీనామా బిశ్వజిత్ బసుతో పాటు కలకత్తా హైకోర్టు మాజీ ప్రధాన న్యాయమూర్తి టీఎస్ శివజ్ఞానం, మాజీ న్యాయమూర్తులు రంజిత్ కుమార్ బాఘ్, ఇంద్రజిత్ ఛటర్జీ ఇప్పటికే ట్రైబ్యునళ్ల నుంచి వైదొలిగారు. మరోవైపు పెండింగ్‌లో ఉన్న దరఖాస్తుల పరిష్కారం నెమ్మదిగా సాగుతుండటంపై పలువురు న్యాయమూర్తులు అసంతృప్తి వ్యక్తం చేసినట్లు తెలుస్తోంది. ఆగస్టు 11న జరిగిన ట్రైబ్యునల్ న్యాయమూర్తుల సమావేశపు వివరాల ప్రకారం, ఈసీఐ నెట్ పోర్టల్ ఆశించిన స్థాయిలో పనిచేయడం లేదని మెజారిటీ న్యాయమూర్తులు ఫిర్యాదు చేశారు. 91 లక్షల మంది ఓటర్ల పేర్ల తొలగింపు బెంగాల్‌లో ఎస్ఐఆర్ ప్రక్రియలో భాగంగా 91 లక్షలకు పైగా ఓటర్ల పేర్లను జాబితా నుంచి తొలగించారు. ఇది సవరణకు ముందు రాష్ట్రంలోని మొత్తం ఓటర్లలో సుమారు 13 శాతంగా ఉంది. సెప్టెంబర్‌లో ఎన్నికల సంఘం దాఖలు చేసిన అఫిడవిట్ ప్రకారం, తార్కిక వ్యత్యాసాల కారణంగా జాబితా నుంచి తొలగించిన 27 లక్షల మందిలో 22 లక్షల మంది తమ పేర్ల తొలగింపును సవాల్ చేస్తూ ట్రైబ్యునళ్లను ఆశ్రయించారు. అదేవిధంగా ఎస్ఐఆర్ సమయంలో ఓటర్ల జాబితాలో కొత్తగా చేర్చిన పేర్లకు వ్యతిరేకంగా కూడా 16.10 లక్షల అప్పీళ్లు దాఖలయ్యాయి. దీంతో మొత్తం అప్పీళ్ల సంఖ్య 38 లక్షలకు చేరింది. ఇంత భారీ సంఖ్యలో దరఖాస్తులు పెండింగ్‌లో ఉండగా, మరో న్యాయమూర్తి రాజీనామా చేయడం బెంగాల్‌లో ఎస్ఐఆర్ అప్పీళ్ల విచారణ వ్యవస్థపై చర్చకు దారితీసింది.