216 గంటల భరతనాట్యం… తొమ్మిది రోజుల అద్భుత సాధనతో చరిత్ర సృష్టించిన దీక్ష!

కళ మీద ప్రేమ ఉంటే ఎంతటి కష్టాన్నైనా అధిగమించవచ్చని నిరూపించారు కర్ణాటకకు చెందిన విదుషి దీక్షా V. 

ఉడుపి జిల్లా బ్రహ్మావర తాలూకాలోని ఆరూరు గ్రామానికి చెందిన దీక్షా, చిన్నప్పటి నుంచే భరతనాట్యం నేర్చుకున్నారు. సాధారణ కుటుంబంలో పుట్టిన ఆమె తల్లి శుభ హాస్టల్ సహాయకురాలిగా, తండ్రి విఠల్ స్కూల్ బస్ డ్రైవర్‌గా పనిచేస్తున్నారు. కుటుంబ పరిస్థితులు ఎలా ఉన్నా, తన కళపై ఉన్న ప్రేమను మాత్రం దీక్ష ఎప్పుడూ వదులుకోలేదు.

2025 ఆగస్టు 21న ఉడుపిలోని డాక్టర్ జి. శంకర్ మహిళా కళాశాలలో తన నృత్య ప్రదర్శనను ప్రారంభించారు. ఒక్కరోజు కాదు… రెండు రోజులు కాదు… ఏకంగా తొమ్మిది రోజుల పాటు మొత్తం 216 గంటలపాటు భరతనాట్యం ప్రదర్శించారు. ప్రతి మూడు గంటలకు 15 నిమిషాల విరామం తీసుకుంటూ ఈ అసాధారణ ప్రదర్శనను పూర్తి చేశారు.

గతంలో 170 గంటల రికార్డును అధిగమించి, Golden Book of World Recordsలో తన పేరును నమోదు చేసుకున్నారు. 

శారీరక అలసటను, ఎన్నో సవాళ్లను అధిగమించి సాధించిన ఈ విజయం ప్రతి కళాకారుడికి స్ఫూర్తి. 

ప్రతిభకు తోడు పట్టుదల ఉంటే అసాధ్యమనుకున్న లక్ష్యాన్ని కూడా చేరుకోవచ్చని దీక్షా నిరూపించారు. ఆమె సాధనకు మనస్ఫూర్తిగా అభినందనలు