24 గంటల్లోనే దొంగతనం కేసు ఛేదించిన తిరువూరు పోలీసులు
వృద్ధ మహిళ నుంచి వెండి ఆంజనేయ స్వామి రూపు అపహరణ.. ఇద్దరు నిందితుల అరెస్ట్
ఎన్టీఆర్ జిల్లా, తిరువూరు: వృద్ధ మహిళ నుంచి వెండి ఆంజనేయ స్వామి రూపును అపహరించిన ఘటనలో తిరువూరు పోలీసులు వేగంగా స్పందించి 24 గంటల్లోనే కేసును ఛేదించారు. ఈ ఘటనకు సంబంధించి ఇద్దరు నిందితులను అరెస్ట్ చేసి, వారి నుంచి అపహరించిన వెండి రూపుతో పాటు నేరానికి ఉపయోగించిన బజాజ్ ప్లాటినా మోటార్ సైకిల్‌ను స్వాధీనం చేసుకున్నారు.
అక్టోబర్ 1న తిరువూరు పట్టణంలోని సుగాలి కాలనీలో ఈ ఘటన చోటుచేసుకుంది. ఇంట్లో ఒంటరిగా ఉన్న వృద్ధ మహిళ మెడలోని ఆభరణాన్ని లాక్కునేందుకు నిందితుడు ప్రయత్నించగా, ఆమె ప్రతిఘటించి కేకలు వేసింది. దీంతో నిందితుడు ఆమె వద్ద ఉన్న వెండి ఆంజనేయ స్వామి రూపును బలవంతంగా లాక్కొని మోటార్ సైకిల్‌పై అక్కడి నుంచి పరారయ్యాడు.
ఈ ఘటనపై తిరువూరు పోలీస్ స్టేషన్‌లో క్రైం నంబర్ 176/2026 కింద కేసు నమోదు చేసి దర్యాప్తు ప్రారంభించారు. తిరువూరు సీఐ గురు ప్రకాష్ ఆధ్వర్యంలో మూడు ప్రత్యేక పోలీసు బృందాలను ఏర్పాటు చేసి నిందితుల కోసం గాలింపు చేపట్టారు. ఘటన జరిగిన ప్రాంతంలోని సీసీ కెమెరాల దృశ్యాలను పరిశీలించడంతో పాటు ఇతర సాంకేతిక ఆధారాలను విశ్లేషించి నిందితులను గుర్తించారు.
అక్టోబర్ 3న తిరువూరు పట్టణ శివారులోని దేవసముద్రం సమీపంలోని డిగ్రీ కళాశాల ఎక్స్‌ రోడ్డు వద్ద ఇద్దరు నిందితులను పోలీసులు అరెస్ట్ చేశారు. అరెస్టయిన వారిలో గొల్లపల్లి రాంకుమారు అలియాస్ డేవిడ్ రాజు, అశోక్, పండు, రాజ్ కుమారుగా పిలవబడే 27 ఏళ్ల వ్యక్తితో పాటు తొమ్మండ్రు ఏసోబు (38) ఉన్నారు. వారి నుంచి అపహరించిన వెండి రూపును, నేరానికి ఉపయోగించిన మోటార్ సైకిల్‌ను స్వాధీనం చేసుకున్నారు.
పోలీసుల విచారణలో నిందితులు గతంలోనూ బడ్డీ కొట్ల తాళాలు పగులగొట్టి నగదు దొంగిలించిన ఘటనల్లో పాల్గొన్నట్లు వెల్లడైందని పోలీసులు తెలిపారు. కేసును వేగంగా ఛేదించడంలో సీసీ కెమెరాల పరిశీలన, సాంకేతిక ఆధారాల విశ్లేషణ కీలకంగా నిలిచాయి.
వృద్ధులు అప్రమత్తంగా ఉండాలి
వృద్ధులు ఇళ్లలో ఒంటరిగా ఉన్న సమయంలో అప్రమత్తంగా ఉండాలని పోలీసులు సూచించారు. అనుమానాస్పద వ్యక్తులు సంచరించినా, గుర్తుతెలియని వాహనాలు కనిపించినా నిర్లక్ష్యం చేయకుండా వెంటనే పోలీసులకు సమాచారం అందించాలని కోరారు. నేరాల నియంత్రణకు ప్రజలు పోలీసులకు సహకరించాలని విజ్ఞప్తి చేశారు.
