ఏపీలో రాజకీయాల్లో కొత్త పరిణామం.. వ్యక్తిగత విమర్శలకు టీడీపీ, వైసీపీ స్వస్తి

ఆంధ్రప్రదేశ్ రాజకీయాల్లో వ్యక్తిగత విమర్శలకు స్వస్తి పలికే దిశగా తెలుగుదేశం పార్టీ, వైఎస్సార్ కాంగ్రెస్ పార్టీ సానుకూల సంకేతాలు ఇచ్చాయి. నాయకుల వ్యక్తిగత జీవితాలను లక్ష్యంగా చేసుకుని విమర్శలు చేయడం, దూషణలకు దిగడం వంటి విధానాలకు ముగింపు పలకాలని ఐటీడీపీ ప్రకటించింది. దీనిపై వైసీపీ కూడా సానుకూలంగా స్పందించింది. వ్యక్తిగత దూషణలను పక్కనపెట్టి ప్రజా సమస్యలు, అభివృద్ధి, పాలనాపరమైన అంశాలపైనే రాజకీయ చర్చలు సాగాలంటూ వైసీపీ మద్దతుదారులు చేసిన పోస్టులను ఆ పార్టీ సామాజిక మాధ్యమ ఖాతాల్లో తిరిగి పంచుకోవడం చర్చనీయాంశంగా మారింది. ఇప్పటివరకు పరస్పర విమర్శలు, వ్యక్తిగత ఆరోపణలతో సాగిన రాజకీయ వాతావరణంలో ఈ పరిణామం కొత్త చర్చకు దారితీసింది. రాజకీయాల్లో సిద్ధాంతాలు, విధానాలు, ప్రజా సమస్యలపై విమర్శలు ఉండాలి తప్ప నాయకుల కుటుంబాలు, వ్యక్తిగత జీవితాలను ప్రస్తావిస్తూ దూషణలకు దిగకూడదనే అభిప్రాయం వ్యక్తమవుతోంది. అయితే ఈ వైఖరి ఆచరణలో ఎంతవరకు కొనసాగుతుందన్నది రాజకీయ వర్గాల్లో ఆసక్తికరంగా మారింది. ఇరు పార్టీల నాయకులు, కార్యకర్తలు కూడా ఇదే విధానాన్ని అనుసరిస్తే రాష్ట్ర రాజకీయాల్లో వ్యక్తిగత దూషణల స్థానంలో ప్రజా సమస్యలపై చర్చలకు ప్రాధాన్యం పెరిగే అవకాశం ఉంది.