ప్రజావాణి ఫిర్యాదుల పరిష్కారంలో నిర్లక్ష్యం వహిస్తే చర్యలు తప్పవు : కలెక్టర్ బి. చంద్రశేఖర్

NTODAY NEWS :  నల్లగొండ

ప్రజావాణిలో అందిన ఫిర్యాదుల పరిష్కారంలో అధికారులు నిర్లక్ష్యం వహించరాదని, వచ్చే వారంలోగా కనీసం 75 శాతం ఫిర్యాదులను పరిష్కరించాలని జిల్లా కలెక్టర్ బి. చంద్రశేఖర్ ఆదేశించారు. జిల్లాలో ప్రస్తుతం 301 ప్రజావాణి ఫిర్యాదులు పెండింగ్‌లో ఉండగా, వచ్చే వారంలో కనీసం 200 ఫిర్యాదులకు పరిష్కారం చూపాలని స్పష్టం చేశారు. 30 రోజులు దాటిన 149 ఫిర్యాదులపై ప్రత్యేక సమీక్ష నిర్వహించి త్వరితగతిన పరిష్కరించాలని సూచించారు. ప్రజావాణికి గైర్హాజరైన అధికారులకు షోకాజ్ నోటీసులు జారీ చేయాలని, విధుల పట్ల నిర్లక్ష్యం వహించే వారిపై చర్యలు తీసుకోవాలని ఆదేశించారు. సోమవారం నిర్వహించిన ప్రజావాణి కార్యక్రమంలో 85 మంది నుంచి ఫిర్యాదులు స్వీకరించగా, రెవెన్యూ శాఖకు సంబంధించి 39, ఇతర శాఖలకు సంబంధించి 46 దరఖాస్తులు అందాయి. ఈ సందర్భంగా అధికారులతో నిర్వహించిన సమీక్షలో సంక్షేమ వసతి గృహాల్లో టాయిలెట్ల పరిశుభ్రత, భోజన నాణ్యత, పరిసరాల నిర్వహణపై ప్రత్యేక దృష్టి సారించాలని సూచించారు. ఈ నెలాఖరులోగా విద్యార్థులందరికీ ఆధార్ కార్డులు అందేలా చర్యలు తీసుకోవడంతో పాటు, బడి మానేసిన పిల్లలను తిరిగి పాఠశాలల్లో చేర్పించాలని ఆదేశించారు. ఎల్‌నినో ప్రభావం దృష్ట్యా వేసవిలో తాగునీటి సమస్యలు తలెత్తకుండా ముందస్తు ప్రణాళికలు సిద్ధం చేయాలని, వాన నీటి సంరక్షణపై ప్రజలకు అవగాహన కల్పించాలని సూచించారు. వి.బి.జి. రాంజీ పథకం కింద మంజూరైన పనులన్నింటినీ వెంటనే ప్రారంభించాలని, చేయూత పెన్షన్ల పంపిణీలో నిబంధనలు తప్పనిసరిగా పాటించాలని, అనర్హులకు పెన్షన్లు మంజూరు చేయవద్దని స్పష్టం చేశారు. ఈ నెల 12న జాతీయ ఎస్టీ కమిషన్ సభ్యులు జాతోతు హుస్సేన్ జిల్లాలో పర్యటించనున్న నేపథ్యంలో గిరిజన సంక్షేమ పథకాల అమలుకు సంబంధించిన నివేదికలను సిద్ధం చేయాలని అధికారులను ఆదేశించారు. పత్రికల్లో ప్రచురితమయ్యే ప్రతికూల వార్తలపై వెంటనే స్పందించి, సంబంధిత వివరణతో పాటు తీసుకున్న చర్యల నివేదికను సమర్పించాలని సూచించారు. ప్రజా సమస్యల పరిష్కారానికి అధికారులు ప్రాధాన్యతనిస్తూ నిర్ణీత గడువులోగా ఫిర్యాదులను పరిష్కరించాలని కలెక్టర్ బి. చంద్రశేఖర్ స్పష్టం చేశారు.