లింగంపల్లిలో విఆర్ వన్ ఫౌండేషన్ ఆధ్వర్యంలో అలయ్ బలయ్ కార్యక్రమం

కులమతాలు, రాజకీయ పార్టీలకు అతీతంగా ఐక్యతతో ఉండాలి: ఫౌండేషన్ చైర్మన్ వెంకటేశ్వర్ రెడ్డి

ఇబ్రహీంపట్నం (ఎన్ టుడే న్యూస్), నవంబర్ 7: కులమతాలు, రాజకీయ పార్టీలకు అతీతంగా ప్రజల మధ్య ఐక్యత, స్నేహభావం పెంపొందించాలనే ఉద్దేశంతో మంచాల మండలం లింగంపల్లి గ్రామంలోని ఫంక్షన్ హాల్‌లో విఆర్ వన్ ఫౌండేషన్ చైర్మన్ వెంకటేశ్వర్ రెడ్డి ఆధ్వర్యంలో అలయ్ బలయ్ కార్యక్రమం నిర్వహించారు.

ఈ కార్యక్రమానికి మంచాల మండలంలోని వివిధ గ్రామాల సర్పంచులు, వార్డు సభ్యులు, ప్రజాప్రతినిధులు, వివిధ రాజకీయ పార్టీల నాయకులు హాజరయ్యారు. పార్టీలకు అతీతంగా వచ్చిన ప్రతినిధులను వేదికపైకి ఆహ్వానించి శాలువాలతో సన్మానించారు. ఒకరినొకరు ఆప్యాయంగా పలకరించుకుంటూ ఆలింగనం చేసుకున్నారు. కళాకారుల ఆటపాటలతో కార్యక్రమాన్ని నిర్వహించారు.

కార్యక్రమానికి ముఖ్య అతిథిగా హాజరైన ప్రొఫెసర్ బి. నాగేశ్వర్ సింగ్ మాట్లాడుతూ, మన సంస్కృతి, సంప్రదాయాలు, మానవ సంబంధాల ప్రాముఖ్యతను వివరించారు. సమాజంలో పరస్పర గౌరవం, స్నేహభావం కొనసాగించాల్సిన అవసరాన్ని తెలియజేశారు.

విఆర్ వన్ ఫౌండేషన్ చైర్మన్ వెంకటేశ్వర్ రెడ్డి మాట్లాడుతూ, కులమతాలు, రాజకీయ పార్టీలకు అతీతంగా అందరూ కలిసిమెలిసి ఉండాలనే ఉద్దేశంతో ఈ కార్యక్రమాన్ని ఏర్పాటు చేసినట్లు తెలిపారు. వివిధ రంగాలకు చెందిన ప్రజాప్రతినిధులు, నాయకులను ఒకే వేదికపైకి ఆహ్వానించి వారితో ఉన్న అనుబంధాన్ని పంచుకోవడం ఆనందంగా ఉందన్నారు.

మన సంస్కృతి, సంప్రదాయాలను కాపాడుకుంటూ ఐక్యతతో ముందుకు సాగాలని ఆయన పిలుపునిచ్చారు. మంచాల మండలంలోని ప్రతి గ్రామంలో విఆర్ వన్ ఫౌండేషన్ ద్వారా పార్టీలకు అతీతంగా సేవా కార్యక్రమాలు నిర్వహిస్తున్నామని తెలిపారు. మండలంలో ఎవరికి ఏ ఆపద వచ్చినా తన వంతు సహాయం అందించేందుకు సిద్ధంగా ఉంటానని, ప్రజలకు సేవ చేస్తానని పేర్కొన్నారు. తన ఆహ్వానం మేరకు కార్యక్రమానికి హాజరైన సర్పంచులు, వార్డు సభ్యులు, ప్రజాప్రతినిధులు, వివిధ పార్టీల నాయకులకు ప్రత్యేక ధన్యవాదాలు తెలిపారు.

ఈ కార్యక్రమంలో ఇబ్రహీంపట్నం మార్కెట్ కమిటీ చైర్మన్ కంబాలపల్లి గురునాథ్ రెడ్డి, మంచాల వ్యవసాయ సహకార సంఘం చైర్మన్ వెదిరె హన్మంత్ రెడ్డి, ఇబ్రహీంపట్నం నియోజకవర్గ కాంగ్రెస్ నాయకుడు కొంగర విష్ణువర్ధన్ రెడ్డి, ప్రజాసంఘాల నాయకుడు కంబాలపల్లి భాస్కర్, అయ్యప్ప స్వాముల గురుస్వామి కావలి శ్రీనివాస్, మంచాల మండల కాంగ్రెస్ అధ్యక్షుడు ఎడ్మ నరేందర్ రెడ్డి, సీపీఎం మండల కార్యదర్శి రావుల జంగయ్య, వైఎస్సార్‌సీపీ నాయకుడు మాధగోని జంగయ్యగౌడ్, మండలంలోని వివిధ గ్రామాల సర్పంచులు, వార్డు సభ్యులు, రాజకీయ పార్టీల నాయకులు తదితరులు పాల్గొన్నారు.