శ్రీ వివేకవర్ధిని పాఠశాలలో ఘనంగా ముందస్తు దీపావళి వేడుకలు

చెడుపై మంచి సాధించిన విజయానికి ప్రతీక దీపావళి: కరస్పాండెంట్ చిర్రా యాకాంతం గౌడ్

నరకాసుర వధ.. శ్రీకృష్ణుడు, గోపికల వేషధారణలో విద్యార్థుల సందడి

కేసముద్రం (ఎన్ టుడే న్యూస్), నవంబర్ 7: కేసముద్రం మండల కేంద్రంలోని శ్రీ వివేకవర్ధిని హైస్కూల్‌లో శనివారం ముందస్తు దీపావళి వేడుకలను ఘనంగా నిర్వహించారు. ఈ సందర్భంగా నరకాసుర వధ ఘట్టాన్ని విద్యార్థులు నాటకరూపంలో ప్రదర్శించారు. శ్రీకృష్ణుడు, గోపికల వేషధారణలో విద్యార్థులు రాక్షసులతో యుద్ధం చేసే సన్నివేశాలను ప్రదర్శించి ఆకట్టుకున్నారు.

అనంతరం నిర్వహించిన సమావేశంలో పాఠశాల కరస్పాండెంట్ చిర్రా యాకాంతం గౌడ్ మాట్లాడుతూ, దీపావళి పండుగ ప్రత్యేకత, ప్రాముఖ్యతను విద్యార్థులకు వివరించారు. చెడుపై మంచి సాధించిన విజయానికి దీపావళి ప్రతీక అని పేర్కొన్నారు. ప్రతి ఒక్కరూ సంతోషంగా, ఆనందోత్సాహాలతో పండుగను జరుపుకోవాలని సూచించారు.

ఈ కార్యక్రమంలో పాఠశాల ప్రిన్సిపల్ చిర్ర నరేష్, ఉపాధ్యాయులు, విద్యార్థులు పాల్గొన్నారు.