తొట్టంబేడు మండల అభివృద్ధికి కృషి చేస్తా: రావిళ్ల మునిరాజా నాయుడు

విజయం ప్రజలది.. పదవి సేవ చేసేందుకు దక్కిన బాధ్యత

తొట్టంబేడు: తొట్టంబేడు మండల ప్రజాభ్యుదయ ప్రస్థానంలో తన విజయం చారిత్రాత్మక ఘట్టమని రావిళ్ల మునిరాజా నాయుడు పేర్కొన్నారు. ఈ విజయం తన ఒక్కడిదే కాదని, మండల అభివృద్ధిని ఆకాంక్షించిన ప్రజలు, తన కోసం రాత్రింబవళ్లు కష్టపడిన కార్యకర్తలందరిదని అన్నారు.

అభివృద్ధి, సంక్షేమానికి మద్దతుగా ఓటు వేసి గెలిపించిన అనంతరం రావిళ్ల మునిరాజా నాయుడు గ్రామంలో అడుగుపెట్టి శ్రీకాళహస్తి ఎమ్మెల్యే బొజ్జల సుధీర్ రెడ్డి, బొజ్జల బృందమ్మను కలిశారు. ఈ సందర్భంగా వారిని కలిసి ఆశీస్సులు తీసుకున్నారు. తనను నమ్మి, అండగా నిలిచి ముందుకు నడిపించిన ఎమ్మెల్యే బొజ్జల సుధీర్ రెడ్డి, బొజ్జల బృందమ్మకు జీవితాంతం రుణపడి ఉంటానని భావోద్వేగంతో పేర్కొన్నారు.

నాయకుల మార్గదర్శకత్వంలో, ప్రజలు విశ్వసించిన అభివృద్ధి బాటలో తొట్టంబేడు మండలాన్ని ముందుకు తీసుకెళ్లడమే తన లక్ష్యమని స్పష్టం చేశారు. తనను ఆశీర్వదించి గెలిపించిన ప్రతి ఒక్కరికీ కృతజ్ఞతలు తెలిపారు.

ఈ పదవిని అధికారంగా కాకుండా తొట్టంబేడు మండల ప్రజలకు సేవ చేసే గొప్ప బాధ్యతగా భావిస్తున్నానని అన్నారు. ప్రజలు తనపై ఉంచిన నమ్మకాన్ని నిలబెట్టుకుంటూ మండల అభివృద్ధి కోసం నిరంతరం కృషి చేస్తానని హామీ ఇచ్చారు.