వెలమ కార్పొరేషన్ చైర్మన్ జువ్వాడి నర్సింగరావుకు కూచడి శ్రీహరి రావు శుభాకాంక్షలు

పుష్పగుచ్ఛం అందజేసి మర్యాదపూర్వకంగా కలిసిన కాంగ్రెస్ పార్టీ నియోజకవర్గ ఇన్‌చార్జి

తెలంగాణ (ఎన్ టుడే న్యూస్): తెలంగాణ వెలమ కార్పొరేషన్ చైర్మన్‌గా బాధ్యతలు స్వీకరించిన జువ్వాడి నర్సింగరావును కాంగ్రెస్ పార్టీ నియోజకవర్గ ఇన్‌చార్జి కూచడి శ్రీహరి రావు శనివారం మర్యాదపూర్వకంగా కలిశారు. ఈ సందర్భంగా ఆయనకు పుష్పగుచ్ఛం అందజేసి శుభాకాంక్షలు తెలిపారు.

అనంతరం కూచడి శ్రీహరి రావు మాట్లాడుతూ, గత బీఆర్‌ఎస్ ప్రభుత్వ హయాంలో వెలమ కార్పొరేషన్ ఏర్పాటు చేయలేదని పేర్కొన్నారు. కాంగ్రెస్ ప్రభుత్వం అధికారంలోకి వచ్చిన తర్వాత ముఖ్యమంత్రి రేవంత్ రెడ్డి వెలమ సామాజిక వర్గానికి న్యాయం చేయాలనే ఉద్దేశంతో ప్రత్యేక కార్పొరేషన్ ఏర్పాటు చేయడం అభినందనీయమన్నారు.

ఇతర సామాజిక వర్గాలకు కార్పొరేషన్లు ఏర్పాటు చేసిన తరహాలో వెలమ సామాజిక వర్గానికి కూడా ప్రత్యేక కార్పొరేషన్ ఏర్పాటు చేయడం స్వాగతించదగిన పరిణామమని అన్నారు. నూతన చైర్మన్ జువ్వాడి నర్సింగరావు నాయకత్వంలో వెలమ సామాజిక వర్గంలోని మధ్యతరగతి కుటుంబాలకు ప్రభుత్వ సంక్షేమ పథకాలు, ఆర్థిక సహాయం అందేలా కృషి చేయాలని ఆకాంక్షించారు.