ఏపీ పదో తరగతి విద్యార్థులకు అలర్ట్..

మార్చి 2027 ఎస్‌ఎస్‌సీ పరీక్షల ఫీజు షెడ్యూల్ విడుదల

అమరావతి (ఎన్ టుడే న్యూస్):

ఆంధ్రప్రదేశ్‌లో మార్చి 2027లో నిర్వహించనున్న పదో తరగతి (ఎస్‌ఎస్‌సీ) పబ్లిక్ పరీక్షల ఫీజు చెల్లింపు షెడ్యూల్‌ను ప్రభుత్వ పరీక్షల డైరెక్టరేట్ విడుదల చేసింది. రెగ్యులర్ విద్యార్థులతో పాటు గతంలో పరీక్షల్లో ఫెయిల్ అయిన విద్యార్థులు కూడా నిర్ణీత గడువులోగా పరీక్ష ఫీజు చెల్లించాల్సి ఉంటుంది.

విద్యార్థుల వివరాలను ముందుగా UDISE+ లాగిన్‌లో పరిశీలించి, అవసరమైన సవరణలు పూర్తి చేయాలని సూచించారు. అనంతరం పాఠశాల లాగిన్ ద్వారా అధికారిక వెబ్‌సైట్ bse.ap.gov.inలో పరీక్ష ఫీజు చెల్లించాలి.

• ఆలస్య రుసుము లేకుండా: నవంబర్ 11 నుంచి నవంబర్ 25, 2026 వరకు.

• రూ.50 ఆలస్య రుసుముతో: నవంబర్ 26 నుంచి డిసెంబర్ 2, 2026 వరకు.

• రూ.200 ఆలస్య రుసుముతో: డిసెంబర్ 3 నుంచి డిసెంబర్ 9, 2026 వరకు.

• రూ.500 ఆలస్య రుసుముతో: డిసెంబర్ 10 నుంచి డిసెంబర్ 15, 2026 వరకు.

• అన్ని సబ్జెక్టులు లేదా మూడు కంటే ఎక్కువ సబ్జెక్టులకు హాజరయ్యే రెగ్యులర్ విద్యార్థులు: రూ.125.

• మూడు సబ్జెక్టుల వరకు హాజరయ్యే విద్యార్థులు: రూ.110.

• ఒకేషనల్ విద్యార్థులకు అదనంగా: రూ.60.

• వయోపరిమితి సడలింపు పొందాల్సిన అండర్‌ఏజ్ విద్యార్థులకు: రూ.300.

పరీక్ష ఫీజు చెల్లింపులు కేవలం పాఠశాల లాగిన్ ద్వారా మాత్రమే చేయాలి. CFMS లేదా బ్యాంకు చలానాల ద్వారా చెల్లించిన ఫీజులను అంగీకరించరు. అలాగే మాన్యువల్ నామినల్ రోల్స్ (MNRs) సమర్పించాల్సిన అవసరం లేదని స్పష్టం చేశారు.

నిర్ణీత గడువు ముగిసిన తర్వాత తేదీలను పొడిగించబోమని పేర్కొన్న నేపథ్యంలో, విద్యార్థులు చివరి తేదీ వరకు వేచి ఉండకుండా సకాలంలో ఫీజు చెల్లింపు ప్రక్రియను పూర్తి చేయాలని సూచించారు.