తిరువూరు నియోజకవర్గంలో అక్రమ రేషన్ బియ్యం వ్యాపారంపై ఆరోపణలు

అధికారుల చర్యలపై స్థానికుల ప్రశ్నలు

ఎన్టీఆర్ జిల్లా: తిరువూరు నియోజకవర్గ పరిధిలో రేషన్ బియ్యం అక్రమ కొనుగోళ్లు, తరలింపులు జరుగుతున్నాయనే ఆరోపణలు స్థానికంగా వినిపిస్తున్నాయి. ముఖ్యంగా ఏ.కొండూరు, గంపలగూడెం మండలాల పరిధిలో ప్రతి నెలా రేషన్ పంపిణీ ప్రారంభమైన సమయంలోనే బియ్యం సేకరణ, తరలింపు జరుగుతోందని స్థానికులు చెబుతున్నారు. విస్సన్నపేట కేంద్రంగా నిర్మానుష్య ప్రాంతాలు, కాలువల సమీప ప్రాంతాలు, పుట్రేల గ్రామం పరిసరాల్లోని మారుమూల ప్రాంతాల వైపు రేషన్ బియ్యం తరలింపునకు సంబంధించిన వాహనాలు రాకపోకలు సాగిస్తున్నాయని వారు ఆరోపిస్తున్నారు. రేషన్ బియ్యాన్ని సేకరించి తరలించేందుకు ప్రత్యేక వాహనాలను వినియోగిస్తున్నారని, ఈ వ్యవహారం కొంతకాలంగా కొనసాగుతున్నప్పటికీ సంబంధిత అధికారులు పూర్తిస్థాయిలో దృష్టి సారించడం లేదనే విమర్శలు వినిపిస్తున్నాయి. పేదలకు అందాల్సిన రేషన్ బియ్యం అక్రమ మార్గాల్లో తరలిపోతున్నట్లు వస్తున్న ఆరోపణలపై అధికారులు క్షేత్రస్థాయిలో తనిఖీలు నిర్వహించి వాస్తవాలను వెలుగులోకి తీసుకురావాలని స్థానికులు కోరుతున్నారు. అక్రమ రేషన్ బియ్యం కొనుగోళ్లు, తరలింపులు నిజమేనా, ఇందులో ఎవరెవరి పాత్ర ఉంది, బియ్యం ఎక్కడి నుంచి ఎక్కడికి తరలిస్తున్నారు, వినియోగిస్తున్న వాహనాలు ఏవి అనే అంశాలపై సమగ్ర విచారణ చేపట్టి, ఆరోపణలు నిజమని తేలితే నిబంధనల ప్రకారం చర్యలు తీసుకోవాలని వారు కోరుతున్నారు.