నిదానపురంలో అంగన్ మిలన్ సేవా కార్యక్రమం
మధిర: సేవా సంకల్ప్ అభియాన్లో భాగంగా “అంగన్ మిలన్ సేవా” కార్యక్రమాన్ని బుధవారం మధిర మండలం నిదానపురం గ్రామంలోని అంగన్వాడీ కేంద్రం-1లో నిర్వహించారు. మధిర మండల అధ్యక్షులు గడ్డం శ్రీహరి చౌదరి ఆధ్వర్యంలో జరిగిన ఈ కార్యక్రమానికి బీజేపీ జిల్లా కార్యవర్గ సభ్యులు గుండా చంద్రశేఖర్ రెడ్డి ముఖ్యఅతిథిగా హాజరయ్యారు.
ఈ సందర్భంగా ఆయన మాట్లాడుతూ అంగన్వాడీ కేంద్రాల ద్వారా చిన్నారులు, గర్భిణీలు, బాలింతలకు అందుతున్న పోషకాహారం, ఆరోగ్య సేవలు, టీకాలు, బాలల అభివృద్ధి కార్యక్రమాలపై అవగాహన కల్పించారు. మిషన్ ఇంద్రధనుష్ ద్వారా చిన్నారులు, గర్భిణీలకు అందుతున్న టీకాల ప్రాధాన్యతను వివరించారు. అలాగే ప్రధానమంత్రి మాతృ వందన యోజన ద్వారా అర్హత కలిగిన గర్భిణీలు, బాలింతలకు అందుతున్న ఆర్థిక సహాయంపై వివరించారు.
అంగన్వాడీ టీచర్లు, ఆయాలు, చిన్నారులతో కలిసి కార్యక్రమాన్ని నిర్వహించారు. “ఆరోగ్యవంతమైన తల్లి – ఆరోగ్యవంతమైన బిడ్డ – బలమైన భారత్” అనే లక్ష్యంతో కేంద్ర ప్రభుత్వం అందిస్తున్న ఆరోగ్య, సంక్షేమ సేవలను ప్రజలు సద్వినియోగం చేసుకోవాలని గుండా చంద్రశేఖర్ రెడ్డి సూచించారు.
కార్యక్రమంలో బీజేపీ మధిర మండల మహిళా మోర్చా నాయకులు చల్లా శైలజ, గుండా శ్రీలక్ష్మి, అమరవాది రాజేశ్వరి, అమరావతి శిల్పిత, అమరవాది పద్మ, ఆర్ఎస్ఎస్ ప్రముఖ్ ఎం. రఘురామిరెడ్డి, వెంకటరెడ్డి తదితరులు పాల్గొన్నారు.
