మధిర శ్రీనిధి పాఠశాలలో ఘనంగా బాలల దినోత్సవ వేడుకలు

ఘనంగా స్వయంపాలన దినోత్సవ వేడుకలు

 మధిర బాలల దినోత్సవాన్ని పురస్కరించుకుని ఖమ్మం జిల్లా మధిర పట్టణంలోని శ్రీనిధి పాఠశాలలో బాలల దినోత్సవం, స్వయంపాలన దినోత్సవ వేడుకలను ఘనంగా నిర్వహించారు. ఈ సందర్భంగా విద్యార్థులు ఉపాధ్యాయుల పాత్రలను స్వీకరించి తరగతులను నిర్వహించడంతో పాటు, పాఠశాల నిర్వహణలో తమకు అప్పగించిన బాధ్యతలను సమర్థవంతంగా నిర్వర్తించారు. విద్యార్థులు ఎంతో ఉత్సాహంగా పాల్గొని తమలోని నాయకత్వ లక్షణాలను, బోధనా నైపుణ్యాలను ప్రదర్శించారు.

అనంతరం నిర్వహించిన ప్రత్యేక కార్యక్రమంలో భారత తొలి ప్రధానమంత్రి పండిట్ జవహర్‌లాల్ నెహ్రూ చిత్రపటానికి పాఠశాల కరస్పాండెంట్ బి. అంజన్ బాబు, డైరెక్టర్ సి.హెచ్. చందు, ప్రిన్సిపాల్ డి. శ్రీనివాసరావు పూలమాలలు వేసి ఘనంగా నివాళులర్పించారు. స్వయంపాలన దినోత్సవంలో ఉత్తమ ప్రతిభ కనబరిచిన విద్యార్థి ఉపాధ్యాయులకు పాఠశాల యాజమాన్యం బహుమతులు అందజేసి అభినందించింది.

ఈ సందర్భంగా పాఠశాల యాజమాన్యం మాట్లాడుతూ విద్యార్థులకు పుస్తక జ్ఞానంతో పాటు నాయకత్వ లక్షణాలు, బాధ్యతాయుతమైన ఆలోచనా విధానం, ఆత్మవిశ్వాసం పెంపొందించడం ఎంతో అవసరమని పేర్కొంది. ఇలాంటి కార్యక్రమాలు విద్యార్థుల్లో దాగి ఉన్న ప్రతిభను వెలికితీయడంతో పాటు భవిష్యత్తులో సమాజంలో బాధ్యతాయుతమైన పౌరులుగా ఎదిగేందుకు దోహదపడతాయని తెలిపింది. విద్యార్థులు, ఉపాధ్యాయుల ఉత్సాహభరిత భాగస్వామ్యంతో వేడుకలు ఆనందోత్సాహాల మధ్య విజయవంతంగా ముగిశాయి.