కాళేశ్వరం ప్రాజెక్టు పేరు మార్పుపై రేవంత్ సర్కార్ యోచన

రూ.4 వేల కోట్ల వ్యయంపై రాజకీయ దుమారం.. పేర్లు మార్చడానికే ప్రాధాన్యమంటూ విమర్శలు కాళేశ్వరం ప్రాజెక్టు పేరు మార్పు అంశం తెలంగాణ రాజకీయాల్లో చర్చనీయాంశంగా మారింది. ముఖ్యమంత్రి రేవంత్ రెడ్డి కాళేశ్వరం ప్రాజెక్టు పేరును మార్చే ఆలోచనలో ఉన్నట్లు మీడియా కథనాల ద్వారా ప్రచారం జరుగుతోంది. రాజీవ్ గాంధీ, ఇందిరా గాంధీ, కొండా లక్ష్మణ్ బాపూజీ, అందెశ్రీ, ప్రాణహిత–చేవెళ్ల వంటి పేర్లను పరిశీలిస్తున్నట్లు సమాచారం. మరోవైపు మేడిగడ్డ బ్యారేజీ మరమ్మతుల విషయంలోనూ ప్రభుత్వ నిర్ణయంపై విమర్శలు వ్యక్తమవుతున్నాయి. ఎలాంటి ఖర్చు లేకుండా తామే మేడిగడ్డ మరమ్మతులు చేపడతామని నిర్మాణ సంస్థలు ముందుకొచ్చినట్లు ప్రచారం జరుగుతుండగా, ప్రభుత్వం మాత్రం రూ.4 వేల కోట్ల వ్యయంతో మరమ్మతులు చేపట్టేందుకు సిద్ధమవుతోందని విమర్శకులు ఆరోపిస్తున్నారు. కాళేశ్వరం, మేడిగడ్డ, అన్నారం, సుందిళ్ల ప్రాజెక్టులకు సంబంధించిన పేర్ల మార్పు కోసం రూ.4 వేల కోట్లు ఖర్చు చేయాలనే ప్రయత్నం జరుగుతోందంటూ విమర్శలు వెల్లువెత్తుతున్నాయి. ప్రాజెక్టుల మరమ్మతులు, నిర్వహణ, ప్రజాధన వినియోగంపై స్పష్టత ఇవ్వాల్సిన అవసరం ఉందని పలువురు అభిప్రాయపడుతున్నారు. అయితే పేరు మార్పుపై అధికారిక ప్రకటన, మరమ్మతుల వ్యయానికి సంబంధించిన పూర్తి వివరాలు వెలువడాల్సి ఉంది.