కొత్తగూడెం, సోమవరం గ్రామాల్లో ఘనంగా అంగన్వాడీ ఉత్సవాలు
చాట్రాయి: ఏలూరు జిల్లా నూజివీడు నియోజకవర్గం చాట్రాయి మండలం కొత్తగూడెం, సోమవరం గ్రామాల్లో సోమవారం అంగన్వాడీ ఉత్సవాలను ఘనంగా అంగన్వాడి పర్యవేక్షకురాలు పి గాయత్రి దేవి ఆధ్వర్యంలో నిర్వహించారు. ఆయా గ్రామాల్లోని అంగన్వాడీ కేంద్రాల్లో నిర్వహించిన కార్యక్రమాలకు గ్రామ పెద్దలు ముఖ్య అతిథులుగా హాజరయ్యారు.
సోమవరం, కొత్తగూడెం గ్రామాలలోని అంగన్వాడీ కేంద్రంలో నిర్వహించిన కార్యక్రమానికి గ్రామ పెద్దలు ఎర్రోజు రాంప్రసాద్, మలగలపల్లి సుబ్రహ్మణ్యం, ఎర్రా రాజారామ్మోహన్‌రావు ముఖ్య అతిథులుగా హాజరయ్యారు. ఏఎన్‌ఎం రాజేశ్వరీదేవి, ఆశా కార్యకర్తలు, అంగన్వాడీ సిబ్బంది, చిన్నారుల తల్లులు, గ్రామస్థులు పాల్గొన్నారు.
ఈ సందర్భంగా అంగన్వాడీ కేంద్రాల ద్వారా చిన్నారులు, గర్భిణులు, బాలింతలకు అందుతున్న సేవలపై అవగాహన కల్పించారు. చిన్నారులకు పౌష్టికాహారం అందించడంతో పాటు వారి ఆరోగ్యం, ఎదుగుదలపై తీసుకుంటున్న చర్యలను వివరించారు. ఐవీఆర్‌ఎస్ కాల్స్‌పై స్పందించే విధానం, బాల్య వివాహాల వల్ల కలిగే నష్టాలపై కూడా అవగాహన కల్పించారు.
అనంతరం ముఖ్య అతిథులుగా హాజరైన గ్రామ పెద్దలు అంగన్వాడీ సూపర్‌వైజర్, ఏఎన్‌ఎం, అంగన్వాడీ సిబ్బంది, ఆరోగ్య సిబ్బంది, ఆశా కార్యకర్తలను సన్మానించారు. కార్యక్రమంలో పాల్గొన్న వారికి చీర, జాకెట్, గాజులు, శాలువాలు అందజేశారు.
