కాప్రా చెరువు అవుట్‌లెట్ పనులకు మరో రూ.7 కోట్లు మంజూరు చేయాలి
బి.ఎన్.రెడ్డినగర్: కాప్రా చెరువు అవుట్‌లెట్ నిర్మాణ పనులను వచ్చే వర్షాకాలంలోపు పూర్తి చేసి, దిగువ ప్రాంతాల కాలనీలకు వరద ముంపు సమస్య నుంచి ఉపశమనం కల్పించాలని ఎమ్మెల్యే సుధీర్ రెడ్డి అధికారులను కోరారు.
బి.ఎన్.రెడ్డినగర్ డివిజన్ పరిధిలోని హరిహరపురం కాలనీలో ఉన్న కాప్రా చెరువు అవుట్‌లెట్ పనుల కోసం గతంలో రూ.5 కోట్లు మంజూరయ్యాయి. ఈ నిధులతో కుమ్మరికుంట నుంచి మిలేనియం కాలనీ వరకు పనులు ప్రస్తుతం కొనసాగుతున్నాయి. మిలేనియం కాలనీ నుంచి కాప్రా చెరువు వరకు మిగిలిన పనులకు మరో రూ.7 కోట్ల మేర నిధులు అవసరమని, వాటి మంజూరు ప్రక్రియ కొనసాగుతోందని తెలిపారు.
ఈ నేపథ్యంలో ఎమ్మెల్యే సుధీర్ రెడ్డి జోనల్ కమిషనర్ వికాస్ మహాతోతో కలిసి కాప్రా చెరువు పరిసర ప్రాంతాల్లో పర్యటించారు. మిలేనియం కాలనీ నుంచి కాప్రా చెరువు వరకు అవుట్‌లెట్ నిర్మాణ పనుల కోసం రూ.7 కోట్లు మంజూరు చేయాలని జోనల్ కమిషనర్‌ను కోరారు. వచ్చే వర్షాకాలానికి ముందే పనులు పూర్తి చేయాలని విజ్ఞప్తి చేశారు.
కాప్రా చెరువు అవుట్‌లెట్ నిర్మాణం పూర్తయితే శాతవాహన నగర్, సాయి గార్డెన్, గాంధీనగర్, గాంధీనగర్ సౌత్, స్నేహమయి నగర్, అఖిలాండేశ్వరి నగర్, పీవీఆర్ కాలనీ, సామానగర్‌తో పాటు ఇతర కాలనీలకు వరద ముంపు సమస్య తగ్గే అవకాశం ఉందని పేర్కొన్నారు.
దీనిపై జోనల్ కమిషనర్ వికాస్ మహాతో స్పందిస్తూ, పనులకు సంబంధించిన ప్రతిపాదనలను ఇప్పటికే పంపించామని, త్వరలోనే పనులు పూర్తి చేసేలా చర్యలు తీసుకుంటామని హామీ ఇచ్చారు.
ఈ పర్యటనలో బి.ఎన్.రెడ్డినగర్ డివిజన్ బీఆర్ఎస్ అధ్యక్షుడు కటిక రెడ్డి అరవింద రెడ్డి, అనిల్ చౌదరి, రాఘవేంద్రరావు, పోగుల రాంబాబు, సందీప్‌తో పాటు వివిధ కాలనీల అధ్యక్షులు, కార్యవర్గ సభ్యులు పాల్గొన్నారు.
