బంగాళాఖాతంలో తీవ్ర తుఫాన్‌గా మారిన అర్నబ్‌
12 గంటల్లో అతి తీవ్ర తుఫాన్‌గా బలపడే అవకాశం
- ఈ నెల 28న ఉదయం బాపట్ల–విశాఖ మధ్య తీరం దాటే అవకాశం
- తీరం దాటే సమయంలో గంటకు 115–125 కి.మీ. వేగంతో గాలులు
- అన్ని పోర్టుల్లో రెండో ప్రమాద హెచ్చరిక జారీ
విశాఖపట్నం | ఎన్ టుడే న్యూస్‌:
బంగాళాఖాతంలో ఏర్పడిన ‘అర్నబ్‌’ తుఫాన్‌ తీవ్ర తుఫాన్‌గా బలపడింది. రానున్న 12 గంటల్లో ఇది అతి తీవ్ర తుఫాన్‌గా మారే అవకాశం ఉందని వాతావరణ అంచనాలు సూచిస్తున్నాయి. ప్రస్తుతం ఈ తుఫాన్‌ గంటకు 17 కిలోమీటర్ల వేగంతో కదులుతోంది.
తుఫాన్‌ విశాఖపట్నానికి 490 కిలోమీటర్లు, కాకినాడకు 560 కిలోమీటర్లు, బాపట్లకు 730 కిలోమీటర్ల దూరంలో కేంద్రీకృతమై ఉన్నట్లు సమాచారం. ఈ నెల 28న ఉదయం బాపట్ల–విశాఖపట్నం మధ్య తీరం దాటే అవకాశం ఉందని అంచనా వేస్తున్నారు.
తీరం దాటే సమయంలో గంటకు 115 నుంచి 125 కిలోమీటర్ల వేగంతో బలమైన గాలులు వీచే అవకాశం ఉంది. తుఫాన్‌ ప్రభావం దృష్ట్యా అన్ని పోర్టుల్లో రెండో ప్రమాద హెచ్చరిక జారీ చేసినట్లు సమాచారం. తుఫాన్‌ కదలికలు, వాతావరణ శాఖ తాజా సూచనలను ప్రజలు గమనిస్తూ అప్రమత్తంగా ఉండాలి.
