వట్టిమర్తి సాయిబాబా ఆలయంలో చోరీకి యత్నం

అలారం మోగడంతో పరారైన దుండగులు

NTODAY NEWS: నల్లగొండ జిల్లా

నల్లగొండ జిల్లా చిట్యాల మండలం వట్టిమర్తి వద్ద జాతీయ రహదారిపై ఉన్న సాయిబాబా ఆలయంలో సోమవారం అర్ధరాత్రి దొంగలు చోరీకి యత్నించడం కలకలం రేపింది. స్థానికులు తెలిపిన వివరాల ప్రకారం రోజువారీ పూజల అనంతరం ఆలయానికి తాళం వేసి వెళ్లిన తర్వాత అర్ధరాత్రి సమయంలో గుర్తుతెలియని వ్యక్తులు ఆలయ తాళాలను పగలగొట్టేందుకు ప్రయత్నించినట్లు తెలిసింది. ఈ క్రమంలో తాళాలకు అమర్చిన అలారం మోగడంతో అప్రమత్తమైన దుండగులు భయంతో అక్కడి నుంచి పరారైనట్లు స్థానికులు వెల్లడించారు. ఘటనపై సమాచారం అందుకున్న పోలీసులు వివరాలు సేకరించి దర్యాప్తు చేపట్టినట్లు సమాచారం. ఆలయంలో చోరీకి యత్నం జరగడంతో స్థానికులు, భక్తులు ఆందోళన వ్యక్తం చేస్తున్నారు. ఆలయాల వద్ద రాత్రి వేళల్లో భద్రతను మరింత కట్టుదిట్టం చేయాలని కోరుతున్నారు.