ఆర్డీఎస్ కాలువలో బోల్తాపడిన ఆటో.. తృటిలో తప్పిన పెను ప్రమాదం

అలంపూర్ మండలంలో ఘటన.. ప్రయాణికులకు తప్పిన ప్రాణాపాయం జోగులాంబ గద్వాల జిల్లా, నవంబర్ 7: అలంపూర్ మండల పరిధిలోని కోనేరు, లింగన్నవాయి గ్రామాల మధ్య ఆర్డీఎస్ కాలువలో శుక్రవారం ఆటో బోల్తాపడింది. ఈ ప్రమాదంలో ఆటోలో ప్రయాణిస్తున్న ఇద్దరు వ్యక్తులు తృటిలో ప్రాణాపాయం నుంచి బయటపడ్డారు. ఉండవెల్లి మండలం చెన్నిపాడు గ్రామానికి చెందిన ఇద్దరు వ్యక్తులు పని నిమిత్తం కోనేరు గ్రామానికి వచ్చారు. పని ముగించుకుని తిరిగి స్వగ్రామానికి వెళ్తుండగా కోనేరు స్టేజీ సమీపంలో ఆటో అదుపుతప్పి ఒక్కసారిగా ఆర్డీఎస్ కాలువలోకి దూసుకెళ్లి బోల్తాపడింది. అయితే ఆటోలో ఉన్న ఇద్దరికీ ఎలాంటి గాయాలు కాకపోవడంతో స్థానికులు ఊపిరి పీల్చుకున్నారు. ప్రమాదాన్ని గమనించిన స్థానికులు వెంటనే అక్కడికి చేరుకుని ట్రాక్టర్ సహాయంతో కాలువలో పడిన ఆటోను బయటకు తీశారు. ప్రమాదంలో ఎలాంటి ప్రాణనష్టం జరగకపోవడంతో అందరూ ఊపిరి పీల్చుకున్నారు.