కొత్తగూడలో విద్యార్థులకు ఓటు హక్కుపై అవగాహన..

మండలస్థాయి పోటీలు నిర్వహణ మహబూబాబాద్ జిల్లా కొత్తగూడ మండలంలో భారత ఎన్నికల సంఘం ఆధ్వర్యంలో విద్యార్థులకు ఓటు హక్కు, ప్రజాస్వామ్య విలువలపై అవగాహన కల్పించేందుకు మండలస్థాయి వక్తృత్వం, క్విజ్ పోటీలు నిర్వహించారు. కొత్తగూడలోని ఎంపీయూపీఎస్ పాఠశాలలో నిర్వహించిన ఈ పోటీల్లో 9, 10వ తరగతులకు చెందిన విద్యార్థులు ఉత్సాహంగా పాల్గొన్నారు. వక్తృత్వ పోటీల్లో కేజీబీవీ పోలారానికి చెందిన ఎం. అక్షయ ప్రథమ బహుమతి సాధించగా, టీజీడబ్ల్యూఆర్ మోడల్ స్పోర్ట్స్ స్కూల్ కొత్తగూడకు చెందిన ఎస్. శ్రీకాంత్ ద్వితీయ బహుమతి పొందారు. క్విజ్ పోటీల్లో పొగుళ్లపల్లి జెడ్పీహెచ్‌ఎస్‌కు చెందిన హెచ్. ప్రభాస్, కె. జయశంకర్ బృందం ప్రథమ బహుమతి సాధించగా, ఎద్దులపల్లి జెడ్పీహెచ్‌ఎస్‌కు చెందిన ఏ. హేమంత్, ఏ. క్రీస్తు బృందం ద్వితీయ బహుమతి గెలుచుకుంది. పోటీల్లో విజయం సాధించిన విద్యార్థులు త్వరలో నిర్వహించనున్న ములుగు నియోజకవర్గస్థాయి పోటీల్లో పాల్గొననున్నారు. కార్యక్రమాన్ని మండల విద్యాశాఖ అధికారి జి. లక్ష్మీనారాయణ పర్యవేక్షించగా, జి. వేణు, టి. రమేష్, ఎ. కోటేశ్వరరావు, కవిత, తహసీల్దార్ రాజు విజేతలను అభినందించారు. చిన్ననాటి నుంచే విద్యార్థుల్లో ప్రజాస్వామ్య విలువలు, ఓటు హక్కుపై అవగాహన పెంపొందించి, భవిష్యత్తులో బాధ్యతాయుతమైన ఓటర్లుగా తీర్చిదిద్దడమే ఈ కార్యక్రమ ప్రధాన లక్ష్యమని నిర్వాహకులు తెలిపారు.