ముద్ర రుణాల పథకానికి మరో ఐదేళ్ల పొడిగింపు.. కేంద్ర కేబినెట్ ఆమోదం

న్యూఢిల్లీ: ప్రధానమంత్రి నరేంద్ర మోదీ అధ్యక్షతన జరిగిన కేంద్ర మంత్రివర్గ సమావేశంలో సూక్ష్మ యూనిట్ల క్రెడిట్ గ్యారెంటీ ఫండ్ (CGFMU) పథకాన్ని మరో ఐదేళ్లపాటు కొనసాగించేందుకు ఆమోదం తెలిపారు. 2031 మార్చి 31 వరకు ఈ పథకం అమల్లో ఉండనుంది. దీని ద్వారా ప్రధానమంత్రి ముద్ర యోజన కింద రుణాలు పొందే చిన్న వ్యాపారులకు మరింత ప్రయోజనం కలగనుంది. ఈ పథకం ద్వారా రుణాలు ఇచ్చే బ్యాంకులు, ఇతర ఆర్థిక సంస్థలకు నేషనల్ క్రెడిట్ గ్యారెంటీ ట్రస్టీ కంపెనీ ద్వారా రుణ ఎగవేత ప్రమాదానికి హామీ లభిస్తుంది. రూ.5 వేల కోట్ల నిధితో సుమారు రూ.12.6 లక్షల కోట్ల విలువైన ముద్ర రుణాలకు భద్రత కల్పించనున్నారు. 2026 సెప్టెంబర్ నాటికి ప్రధానమంత్రి ముద్ర యోజన ప్రారంభమైనప్పటి నుంచి దేశవ్యాప్తంగా 60.36 కోట్లకు పైగా రుణాలు మంజూరయ్యాయి. వీటి మొత్తం విలువ రూ.43.34 లక్షల కోట్లుగా నమోదైంది. 2016 జనవరిలో ప్రారంభమైన క్రెడిట్ గ్యారెంటీ ఫండ్ పథకం ముద్ర రుణాల విస్తరణలో కీలక పాత్ర పోషిస్తోంది. ఈ పథకం కింద అర్హత కలిగిన సూక్ష్మ సంస్థలకు రూ.20 లక్షల వరకు ఇచ్చే ముద్ర రుణాలకు హామీ కల్పిస్తారు. ప్రధానమంత్రి జన్‌ధన్ యోజన ఖాతాలపై బ్యాంకులు అందించే రూ.10 వేల వరకు ఓవర్‌డ్రాఫ్ట్‌లకు కూడా ఈ హామీ వర్తిస్తుంది. అలాగే రూ.10 లక్షల నుంచి రూ.20 లక్షల వరకు రుణ పోర్ట్‌ఫోలియో కలిగిన స్వయం సహాయక సంఘాలకు ఇచ్చే రుణాలకూ గ్యారెంటీ సదుపాయం ఉంటుంది. మరోవైపు, రుణ సంస్థలపై భారం తగ్గించేలా వార్షిక హామీ రుసుమును ఒక శాతం నుంచి 0.75 శాతానికి తగ్గించారు. అయితే స్వయం సహాయక సంఘాలకు మొదటి ఏడాది 0.25 శాతం, తదుపరి సంవత్సరాల్లో 0.50 శాతం రుసుము కొనసాగుతుంది. 2026-27 నుంచి 2030-31 ఆర్థిక సంవత్సరాల మధ్య ముద్ర పథకం కింద మంజూరయ్యే అర్హత కలిగిన రుణాలకు ఈ సదుపాయం వర్తించనుంది. ఈ పథకం కొనసాగింపుతో పూచీకత్తు లేకుండా రుణాలు పొందే అవకాశం మరింత విస్తరించనుంది. ముఖ్యంగా గతంలో బ్యాంకుల నుంచి రుణాలు పొందలేని చిన్న వ్యాపారులు, యువ పారిశ్రామికవేత్తలకు ప్రయోజనం చేకూరనుంది. కొత్త వ్యాపారాల ప్రారంభం, ఇప్పటికే ఉన్న వ్యాపారాల విస్తరణకు ఆర్థిక చేయూత లభించనుంది. తద్వారా దేశంలో సూక్ష్మ పరిశ్రమల అభివృద్ధి, ఉపాధి అవకాశాల పెంపునకు ఈ నిర్ణయం దోహదపడనుంది

.