సోషల్ మీడియా పరిచయాలతో జాగ్రత్త

హైదరాబాద్: సోషల్ మీడియా వేదికలైన ఇన్‌స్టాగ్రామ్, ఫేస్‌బుక్‌లో పరిచయాల విషయంలో యువత, ముఖ్యంగా 16 నుంచి 18 ఏళ్ల మధ్య వయసున్న బాలబాలికలు అప్రమత్తంగా ఉండాలని పోలీసులు సూచిస్తున్నారు. ఇటీవలి సైబర్ నేరాల కేసుల నేపథ్యంలో గుర్తుతెలియని వ్యక్తులతో సోషల్ మీడియా ద్వారా ఏర్పడే పరిచయాల విషయంలో జాగ్రత్త అవసరమని చెబుతున్నారు.

కొంతమంది నేరస్థులు నకిలీ సోషల్ మీడియా ఖాతాలను సృష్టించి యువతతో పరిచయం పెంచుకుంటున్నట్లు పోలీసులు గుర్తించారు. అనంతరం నమ్మకం కలిగించి వ్యక్తిగత ఫొటోలు, ఇతర వివరాలను సేకరించి వాటిని దుర్వినియోగం చేస్తూ బెదిరింపులకు పాల్పడే అవకాశముందని హెచ్చరిస్తున్నారు.

గుర్తుతెలియని వ్యక్తుల నుంచి వచ్చే ఫ్రెండ్ రిక్వెస్టులు, మెసేజ్‌లను స్వీకరించే విషయంలో అప్రమత్తంగా ఉండాలని, వ్యక్తిగత ఫొటోలు, వీడియోలు, ఫోన్ నంబర్లు, ఇతర సున్నితమైన సమాచారాన్ని పంపవద్దని సూచిస్తున్నారు.

ఎవరైనా వ్యక్తిగత ఫొటోలు లేదా వీడియోల పేరుతో బెదిరింపులకు పాల్పడితే భయపడకుండా ఆధారాలను భద్రపరచాలని పోలీసులు సూచిస్తున్నారు. సంబంధిత సోషల్ మీడియా ఖాతాలు, మెసేజ్‌లు, ఫొటోలు, బెదిరింపులకు సంబంధించిన స్క్రీన్‌షాట్లను డిలీట్ చేయకుండా భద్రపరచడం ద్వారా దర్యాప్తులో ఉపయోగపడే ఆధారాలను అందించవచ్చని తెలిపారు.

సైబర్ నేరానికి గురైన వారు National Cyber Crime Reporting Portal ద్వారా ఫిర్యాదు చేయవచ్చు. అత్యవసర పరిస్థితుల్లో స్థానిక పోలీసులను సంప్రదించాలని సూచించారు.