గోడను ఢీకొని గాల్లోకి ఎగిరిన బైకర్..

స్వల్ప గాయాలతో బయటపడిన వైనం!

రాజస్థాన్: రాజస్థాన్‌లో జరిగిన రోడ్డు ప్రమాదానికి సంబంధించిన వీడియో ప్రస్తుతం సోషల్ మీడియాలో వైరల్‌గా మారింది. స్ప్లెండర్ బైక్‌పై వేగంగా వెళ్తున్న ఓ వ్యక్తి అదుపుతప్పి రహదారి పక్కన ఉన్న గోడను ఢీకొట్టాడు. ప్రమాద తీవ్రతకు బైక్‌పై ఉన్న వ్యక్తి గాల్లోకి ఎగిరి సుమారు 8 అడుగుల ఎత్తులో ఉన్న బోర్డును తాకుతూ రోడ్డుపై పడిపోయాడు.

ఈ ప్రమాదంలో బైకర్ హెల్మెట్ ధరించలేదని వీడియోలో కనిపిస్తోంది. అంత ఎత్తు నుంచి రోడ్డుపై పడినప్పటికీ అతడు స్వల్ప గాయాలతో బయటపడినట్లు సమాచారం. ప్రమాదం జరిగిన వెంటనే పైకి లేచి నడుచుకుంటూ వెళ్లడం వీడియోలో కనిపించడంతో ఈ ఘటన పలువురిని ఆశ్చర్యానికి గురిచేసింది.

సాధారణంగా ఇలాంటి ప్రమాదాల్లో తీవ్ర గాయాలయ్యే అవకాశం ఉండటంతో ఈ ఘటనపై నెటిజన్లు స్పందిస్తున్నారు. బైకర్ ప్రాణాలతో బయటపడటంపై ఆశ్చర్యం వ్యక్తం చేస్తూ, 'యముడు సెలవులో ఉన్నాడేమో' అంటూ సరదా వ్యాఖ్యలు చేస్తున్నారు.

మరోవైపు ఈ ఘటన ద్విచక్ర వాహనదారులకు హెల్మెట్ ప్రాముఖ్యతను మరోసారి గుర్తుచేస్తోంది. ప్రమాదం ఎంత చిన్నదైనా హెల్మెట్ ధరించడం ప్రాణరక్షణకు కీలకమని, వాహనదారులు వేగ నియంత్రణ పాటిస్తూ ట్రాఫిక్ నిబంధనలు తప్పనిసరిగా పాటించాలని సూచిస్తున్నారు.