నిర్మల్‌లో బీజేపీ మహా పాదయాత్ర.. భారీగా తరలివచ్చిన పార్టీ శ్రేణులు
కాషాయ జెండాలతో జనసంద్రంగా మారిన పట్టణ వీధులు.. కాంగ్రెస్ ప్రభుత్వంపై ఎమ్మెల్యే ఏలేటి మహేశ్వర్ రెడ్డి విమర్శలు
నిర్మల్ (ఎన్ టుడే న్యూస్):
నిర్మల్ పట్టణంలో భారతీయ జనతా పార్టీ ఆధ్వర్యంలో నిర్వహించిన మహా పాదయాత్రకు ప్రజలు, పార్టీ శ్రేణులు భారీగా తరలివచ్చారు. కాషాయ జెండాలతో పట్టణంలోని ప్రధాన వీధులు సందడిగా మారాయి. ప్రత్యేక సమగ్ర ఓటర్ల జాబితా సవరణ (ఎస్‌ఐఆర్‌)పై కాంగ్రెస్, ఇండియా కూటమి చేస్తున్న దుష్ప్రచారాన్ని తిప్పికొట్టాలనే నినాదంతో ఈ పాదయాత్ర నిర్వహించినట్లు బీజేపీ నాయకులు తెలిపారు.
కాంగ్రెస్ ప్రభుత్వంపై ఎమ్మెల్యే విమర్శలు
ఈ సందర్భంగా బీజేపీ శాసనసభాపక్ష నేత, నిర్మల్ ఎమ్మెల్యే ఏలేటి మహేశ్వర్ రెడ్డి మాట్లాడుతూ.. ఎన్నికల సమయంలో కాంగ్రెస్ ప్రభుత్వం ప్రజలకు ఇచ్చిన ఆరు గ్యారంటీలను అమలు చేయడంలో విఫలమైందని విమర్శించారు.
నెలకు రూ.4 వేల పెన్షన్, నిరుద్యోగులకు ఉద్యోగాలు, విద్యార్థులకు ఫీజు రీయింబర్స్‌మెంట్, రైతు భరోసా వంటి హామీలను ప్రభుత్వం నెరవేర్చలేదని ఆరోపించారు.
ప్రజా సమస్యలను పట్టించుకోవడం లేదని ఆరోపణ
ముఖ్యమంత్రి రేవంత్ రెడ్డి ప్రజా సమస్యల పరిష్కారంపై దృష్టి పెట్టకుండా ఢిల్లీ రాజకీయాలకు ప్రాధాన్యమిస్తున్నారని మహేశ్వర్ రెడ్డి విమర్శించారు. ప్రజలకు ఇచ్చిన హామీల అమలుపై ప్రభుత్వం సమాధానం చెప్పాలని డిమాండ్ చేశారు.
