కీసర పోలీస్‌స్టేషన్‌లో లంచం వ్యవహారం.. ఏసీబీకి చిక్కిన ఎస్సై

చార్జ్‌షీట్ త్వరగా దాఖలు చేసేందుకు రూ.5 లక్షలు డిమాండ్.. రూ.2 లక్షలు తీసుకుంటుండగా పట్టుకున్న అధికారులు

హైదరాబాద్, నవంబర్ 9 (ఎన్ టుడే న్యూస్):

కీసర పోలీస్‌స్టేషన్‌లో మరో అవినీతి వ్యవహారం వెలుగులోకి వచ్చింది. చార్జ్‌షీట్‌లో అనుకూలంగా వ్యవహరించడంతో పాటు, దానిని త్వరగా దాఖలు చేసేందుకు లంచం డిమాండ్ చేసిన ఎస్సై కొండారెడ్డి శ్రీనివాస్‌ను అవినీతి నిరోధక శాఖ (ఏసీబీ) అధికారులు రెడ్‌హ్యాండెడ్‌గా పట్టుకున్నారు.

బాధితుడి నుంచి రూ.5 లక్షలు లంచంగా డిమాండ్ చేసిన ఎస్సై, చివరకు రూ.2 లక్షలకు ఒప్పందం కుదుర్చుకున్నట్లు సమాచారం. ఈ క్రమంలో బాధితుడి నుంచి రూ.2 లక్షలు స్వీకరిస్తుండగా నాగారం పరిధిలోని శిల్పానగర్ కాలనీలో సోమవారం ఏసీబీ అధికారులు వలపన్ని పట్టుకున్నారు.

ఈ ఘటనకు సంబంధించిన వివరాలను హైదరాబాద్ ఏసీబీ డీఎస్పీ గంగాసాని శ్రీధర్ వెల్లడించారు. చార్జ్‌షీట్ విషయంలో అనుకూలంగా వ్యవహరించేందుకు, త్వరగా దాఖలు చేసేందుకు లంచం డిమాండ్ చేసినట్లు ఆయన వివరించారు.

పోలీసు శాఖలో అవినీతి వ్యవహారం వెలుగులోకి రావడం స్థానికంగా చర్చనీయాంశంగా మారింది.