ఇందిరమ్మ ఇళ్ల ప్రత్యేక కథనంపై కలెక్టర్ స్నేహ శబరిష్ ప్రశంసలు

క్యాపిటల్ ఇన్ఫర్మేషన్ కథనాన్ని అభినందించిన జిల్లా కలెక్టర్

గార్ల, నవంబర్ 09 (ఎన్ టుడే న్యూస్):

మహబూబాబాద్ జిల్లాలో ఇందిరమ్మ ఇళ్ల పథకం అమలు తీరు, పేద కుటుంబాల జీవితాల్లో వస్తున్న మార్పులు, ప్రభుత్వ సంక్షేమ కార్యక్రమాల పురోగతిని వివరిస్తూ క్యాపిటల్ ఇన్ఫర్మేషన్ దినపత్రికలో ప్రచురితమైన ప్రత్యేక కథనంపై జిల్లా కలెక్టర్ స్నేహ శబరిష్ ప్రశంసలు వ్యక్తం చేశారు. ప్రజలకు ఉపయోగపడే అంశాలను గుర్తించి, ప్రభుత్వ పథకాల అమలు తీరును క్షేత్రస్థాయిలో పరిశీలించి, లబ్ధిదారుల అనుభవాలు, అభివృద్ధి కార్యక్రమాలను ప్రజల ముందుకు తీసుకురావడం అభినందనీయమని పేర్కొన్నారు.

ఇందిరమ్మ ఇళ్ల పథకం ద్వారా నిరుపేద కుటుంబాలకు కలుగుతున్న ప్రయోజనాలు, మహబూబాబాద్ జిల్లాలో ఈ పథకం అమలులో సాధించిన పురోగతిని ప్రత్యేక కథనం ద్వారా సమగ్రంగా వివరించారని కలెక్టర్ ప్రశంసించారు. ప్రభుత్వ సంక్షేమ పథకాల ద్వారా ప్రజలకు అందుతున్న ప్రయోజనాలను వెలుగులోకి తీసుకురావడంలో మీడియా పాత్ర కీలకమని అభిప్రాయపడ్డారు.

ఈ సందర్భంగా ప్రత్యేక కథనాన్ని రూపొందించిన క్యాపిటల్ ఇన్ఫర్మేషన్ మహబూబాబాద్ జిల్లా బ్యూరో చీఫ్ రావూరి ప్రశాంత్‌ను కలెక్టర్ స్నేహ శబరిష్ అభినందించారు. జర్నలిస్టులు ప్రజలకు ఉపయోగపడే సంక్షేమ పథకాలు, అభివృద్ధి కార్యక్రమాలు, క్షేత్రస్థాయిలోని వాస్తవ పరిస్థితులను వెలుగులోకి తీసుకురావడంలో బాధ్యతాయుతంగా వ్యవహరించాలని పేర్కొన్నారు. ఈ కార్యక్రమంలో జిల్లా పౌర సంబంధాల అధికారి రాజేంద్రప్రసాద్ పాల్గొన్నారు.

కలెక్టర్ నుంచి ప్రశంసలు అందుకోవడంపై రావూరి ప్రశాంత్ స్పందిస్తూ, ఈ అభినందన తన బాధ్యతను మరింత పెంచిందని తెలిపారు. ప్రజా సమస్యలు, ప్రభుత్వ సంక్షేమ పథకాలు, అభివృద్ధి కార్యక్రమాలను నిష్పక్షపాతంగా ప్రజల ముందుకు తీసుకురావడమే తన లక్ష్యమని పేర్కొన్నారు.

ఈ కార్యక్రమంలో ఎడ్ల రాజశేఖర్, గుండోజు శ్రీను, శెట్టి థామస్, కట్ట రవీంద్రాచారి తదితరులు పాల్గొన్నారు.