ఓబీసీ కులగణన చేపట్టాలని డిమాండ్

హైదరాబాద్: సామాజిక న్యాయం, బీసీల రాజ్యాంగ హక్కుల పరిరక్షణతో పాటు జాతీయ జనగణనలో ఓబీసీ కులాల గణన చేపట్టాలని డిమాండ్ చేస్తూ నిర్వహించిన కార్యక్రమంలో కాంగ్రెస్ పార్టీకి చెందిన పలువురు నేతలు పాల్గొన్నారు.

పీసీసీ చీఫ్ మహేష్ కుమార్ గౌడ్, ప్రభుత్వ సలహాదారు వి.హనుమంతరావు, రాజ్యసభ సభ్యుడు అనిల్ కుమార్ యాదవ్, ఎమ్మెల్యేలు, ఎమ్మెల్సీలు, ఎంపీలు, కార్పొరేషన్ చైర్మన్లు, పార్టీ ముఖ్య నేతలతో కలిసి కార్యక్రమంలో పాల్గొన్నట్లు తెలిపారు.

ఈ సందర్భంగా నాయకులు మాట్లాడుతూ దేశంలో బీసీల జనాభా ఎంత ఉందో తెలుసుకోవడం కేవలం గణాంకాల కోసం కాదని అన్నారు. జనాభా వివరాల ఆధారంగా బీసీలకు వారి హక్కులు, ప్రాతినిధ్యం, అవకాశాలు, అభివృద్ధి కార్యక్రమాల్లో తగిన వాటా కల్పించేందుకు కులగణన అవసరమని పేర్కొన్నారు.

జాతీయ స్థాయిలో ఓబీసీ కులాల గణన చేపట్టాలని వారు డిమాండ్ చేశారు. కులగణన ద్వారా బీసీల సామాజిక, ఆర్థిక పరిస్థితులపై స్పష్టమైన సమాచారం లభిస్తుందని, తదనుగుణంగా ప్రభుత్వ విధానాలు, సంక్షేమ కార్యక్రమాలను రూపొందించేందుకు అవకాశం ఉంటుందని తెలిపారు.

బీసీల హక్కుల కోసం తమ పోరాటం కొనసాగుతుందని నాయకులు అన్నారు. కులగణన చేపట్టి జనాభా ప్రాతిపదికన బీసీలకు హక్కులు, అవకాశాలు, రాజకీయ మరియు సామాజిక ప్రాతినిధ్యం కల్పించాలని డిమాండ్ చేశారు. సామాజిక న్యాయం సాధించే వరకు తమ డిమాండ్‌ను కొనసాగిస్తామని స్పష్టం చేశారు.