ఏఆర్ రెహమాన్ అభిమానులకు నిరాశ.. 2027కి గురుగ్రామ్ సంగీత కచేరీ వాయిదా

ప్రముఖ సంగీత దర్శకుడు ఏఆర్ రెహమాన్ నిర్వహించనున్న గురుగ్రామ్ సంగీత కచేరీ వాయిదా పడింది. నవంబర్ 21న గురుగ్రామ్‌లోని బ్యాక్‌యార్డ్ స్పోర్ట్స్ క్లబ్‌లో జరగాల్సిన 'వండర్‌మెంట్ టూర్' కార్యక్రమాన్ని అనూహ్య పరిస్థితుల కారణంగా 2027కి వాయిదా వేస్తున్నట్లు నిర్వాహక సంస్థ ఈవా లైవ్ ప్రకటించింది. అయితే కొత్త తేదీని మాత్రం ఇంకా వెల్లడించలేదు. ఈ కార్యక్రమం కోసం ఇప్పటికే టిక్కెట్లు కొనుగోలు చేసిన వారికి టిక్కెట్ల ధరలను తిరిగి చెల్లించే ప్రక్రియను సంబంధిత విక్రయ సంస్థలు ప్రారంభించాయి. టిక్కెట్ల ధరలు రూ.2,499 నుంచి రూ.1.50 లక్షల వరకు ఉన్నాయి. కచేరీ కోసం ముందుగానే ప్రయాణ ఏర్పాట్లు చేసుకున్న అభిమానులు ఈ నిర్ణయంతో తీవ్ర నిరాశకు గురయ్యారు. కొత్త తేదీ ప్రకటన కోసం సంగీత ప్రియులు ఎదురుచూస్తున్నారు

.