మాదాపూర్‌లో బొలేరో ఢీకొని వృద్ధుడు మృతి
హైదరాబాద్, మాదాపూర్: పర్వత్‌నగర్ ఫిష్ మార్కెట్ వెనుక ఉన్న శ్రీ వెంకట రామాంజనేయ నర్సరీలో జరిగిన ప్రమాదంలో 65 ఏళ్ల వృద్ధుడు మృతి చెందాడు. బొలేరో వాహనాన్ని రివర్స్ తీస్తుండగా ఈ ప్రమాదం జరిగినట్లు సమాచారం.
పోలీసులు తెలిపిన వివరాల ప్రకారం.. బొలేరో వాహనాన్ని రివర్స్ తీస్తున్న సమయంలో డ్రైవర్ అజాగ్రత్తగా వ్యవహరించడంతో అక్కడే ఉన్న కోల సూగురయ్య (65)ను వాహనం ఢీకొట్టింది. అనంతరం కొంత దూరం వాహనంతో పాటు ఈడ్చుకెళ్లినట్లు తెలుస్తోంది.
ప్రమాదంలో తీవ్రంగా గాయపడిన సూగురయ్యను చికిత్స కోసం ఆస్పత్రికి తరలించారు. అయితే చికిత్స పొందుతూ మృతి చెందినట్లు పోలీసులు తెలిపారు.
ఈ ఘటనపై పోలీసులు కేసు నమోదు చేసి దర్యాప్తు చేపట్టారు. బీహార్‌కు చెందిన బొలేరో డ్రైవర్ చోటు కుమార్ (20), నర్సరీ యజమాని మల్లికార్జున్‌పై కేసు నమోదు చేసినట్లు సమాచారం. ప్రమాదానికి దారితీసిన పరిస్థితులు, బాధ్యత ఎవరిది అనే అంశాలపై పోలీసులు దర్యాప్తు చేస్తున్నారు.
